ترکیہ کے جنگلات میں آتشزدگی،3600لوگوں کا انخلا

استنبول کو مغربی شہر ازمیر سے ملانے والی شاہراہ کوبند کردیاگیا

پیر 28 جولائی 2025 16:38

انقرہ(اُردو پوائنٹ اخبارتازہ ترین - این این آئی۔ 28 جولائی2025ء)بحیرہ روم میں ہیٹ ویو کے درمیان ترکیہ کے جنگلات میں لگنے والی آگ کے باعث 2 صوبوں کی بستیوں سے 3,600 سے زیادہ لوگوں کو نکال لیا گیا۔ متحدہ عرب امارات کی نیوز ایجنسی کے مطابق زراعت اور جنگلات کے وزیر ابراہیم یومکلی نے صحافیوں کو بتایا کہ جنوبی صوبوں مرسین اور انطالیہ کے ساتھ ساتھ وسطی صوبہ اسک میں جنگلات میں لگنے والی آگ پر کافی حد تک قابو پالیا گیا ہے لیکن شمال مغربی صوبے برسا اور شمالی صوبے کرابوک میں اب بھی آگ پر قابو نہیں پایا جا سکا ۔

صوبے برسا کے گورسو اور کیسٹل اضلاع کے درمیان جنگلات میں آگ بھڑک اٹھی، جہاں ترکیہ کی آٹو انڈسٹری کا زیادہ تر حصہ ہے۔ جنگلات میں لگنے والی آگ کے باعث استنبول کو مغربی شہر ازمیر سے ملانے والی شاہراہ کا کچھ حصہ مختصر طور پر بند کر دیا گیا تھا۔

(جاری ہے)

فوٹیج سے معلوم ہوتا ہے کہ صوبہ برسا میں گھروں کے قریب کے علاقوں میں آگ کے بڑے شعلوں نے درختوں کو اپنی لپیٹ میں لے لیا اور دھواں آسمان کی طرف پھیل گیا گیا۔ ترکیہ کے کئی علاقوں میں اتوار کو درجہ حرارت 40 ڈگری سینٹی گریڈ تک پہنچنے کی پیش گوئی کی گئی تھی، جو موسمی معیارات سے 6 سے 12 ڈگری زیادہ ہے۔ ترکیہ کی موسمیاتی سروس نے بتایا کہ تاریخ میں پہلی بار ہفتہ کو ملک کے جنوب مشرق میں درجہ حرارت 50 ڈگری سینٹی گریڈ تک پہنچ گیا۔