30 سیکنڈ کے لیے کیس سنا، 12 تاریخ دے دی گئی‘علیمہ خان

ان کو پتہ ہو گا کہ سلمان صفدر ملک سے باہر ہیں تو 24 گھنٹے کے اندر کیس لگا دیا‘نجی ٹی وی سے گفتگو

منگل 29 جولائی 2025 16:11

30 سیکنڈ کے لیے کیس سنا، 12 تاریخ دے دی گئی‘علیمہ خان

اسلام آباد(اُردو پوائنٹ اخبارتازہ ترین - این این آئی۔ 29 جولائی2025ء)بانی پی ٹی آئی کی بہن علیمہ خان نے کہا ہے کہ سلمان صفدر ملک سے باہر ہیں تو 24 گھنٹے کے اندر کیس لگا دیا، یہ سوچ رہے تھے کہ وکیل پیش نہیں ہوسکیں گے لیکن سلمان اکرم راجہ پیش ہوئے۔سپریم کورٹ کے باہر نجی ٹی وی سے گفتگو کرتے ہوئے انہوں نے کہا کہ 30 سیکنڈ کے لیے کیس سنا، 12 تاریخ دے دی گئی کہ اس کے درمیان کوئی ٹائم نہیں ہے۔

علیمہ خان کا کہنا تھا کہ آج بانی سے اہلخانہ کی ملاقات کا دن ہے اور ہم نے عدالت سے بھی حکم نامہ لیا ہوا ہے، آج توشہ خانہ کیس کی سماعت بھی ہے۔

(جاری ہے)

گزشتہ سماعت پر پراسیکیوشن کے 12 وکلاء اور عملہ ملا کر 20 کے قریب افراد جاتے تھے، ہماری جانب سے جیل انتظامیہ صرف ایک وکیل کو جانے دیتی ہے۔انہوں نے کہا کہ ہمارے وکلاء کی ٹیم کو اڈیالہ جیل کے اندر نہیں جانے دیا جاتا اور نہ ہی فیملی کو، یہ اوپن ٹرائل ہے ہی نہیں اور یہ ٹرائل کے تقاضے بھی پورے نہیں کر رہے ہیں، ہم یہی چاہتے ہیں کہ فیئر ٹرائل کے تقاضے پورے کیے جائیں۔

ان کا یہ بھی کہنا تھا کہ جج نے کہا کہ اہل خانہ اور وکلاء کو بلائیں لیکن جیل انتظامیہ حکم نہیں مان رہی تھی، اڈیالہ جیل کی انتظامیہ ملاقاتوں اور کیس کے حوالے سے جج کی نہیں سنی جا رہی۔