فیصل آباد، کاشتکاروں کو زیادہ سے زیادہ رقبہ پر زیتون کاشت کرنے کی ہدایت

منگل 29 جولائی 2025 16:19

فیصل آباد (اُردو پوائنٹ اخبارتازہ ترین - اے پی پی۔ 29 جولائی2025ء) خوردنی تیل کی ضروریات پوری کرنے کیلئے کاشتکاروں کو زیادہ سے زیادہ رقبہ پر زیتون کاشت کرنے کی ہدایت کی گئی ہے۔نظامت زرعی اطلاعات محکمہ زراعت کے ترجمان نے کہاکہ زیتون کی کاشت کو فروغ دے کر جہاں اربوں روپے کا قیمتی زرمبادلہ بچایاجاسکتاہے وہیں ملکی ضروریات پوری کرنے کے بعد اضافی پیداواربھی برآمد کی جا سکتی ہے۔

(جاری ہے)

ترجمان نے کہاکہ زیتو ن کی کاشت کےلئے گرم و معتدل درجہ حرارت انتہائی موزوں ہے لہٰذا ایسے علاقے جہاں زیادہ سردی نہ پڑتی ہووہاں زیتون کو بآسانی کاشت کیاجاسکتاہے۔ انہوں نے کہاکہ زیتون میں کلیاں بننے کےلئے موسم سرما کے دوران روزانہ درجہ حرارت کااتار چڑھاؤ ایک سے 15 ڈگری سینٹی گریڈ ہونا ضروری ہے تاہم پھول بننے کے بعد سردی زیتون کی فصل کو متاثر کر سکتی ہے۔ انہوں نے کہاکہ کاشتکار زیتون کی کاشت کےلئے مزید رہنمائی کے لئے ماہرین زراعت یا محکمہ زراعت کے فیلڈ سٹاف کی خدمات سے بھی استفادہ کرسکتے ہیں۔