دھان کی فصل ،کاشتکاروں کو ضرررساں کیڑوں و بیماریوں کے بروقت انسداد کی ہدایت

بدھ 30 جولائی 2025 11:47

فیصل آباد (اُردو پوائنٹ اخبارتازہ ترین - اے پی پی۔ 30 جولائی2025ء) گراس ہاپر،دھان کے تنے کی سنڈیاں، پتہ لپیٹ سنڈی، سفید پشت والا تیلا دھان کی فصل کو نقصان پہنچا سکتے ہیں لہٰذا کاشتکاروں کو دھان کے ضرررساں کیڑوں وبیماریوں کے فوری انسداد کی ہدایت کی گئی ہے۔ڈپٹی ڈائریکٹرپلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈز محکمہ زراعت فیصل آباداسرارارشدنے بتایاکہ دھان کی فصل پر بہت سے کیڑے حملہ آور ہوسکتے ہیں جن میں سب سے زیادہ نقصان دہ کیڑے دھان کے تنے کی سنڈیاں، پتہ لپیٹ سنڈی، سفید پشت والا تیلا اور گراس ہاپر ہیں۔

انہوں نے بتایاکہ تنے کی سنڈیاں زیادہ تر باسمتی اقسام پر حملہ آور ہوتی ہیں جبکہ پتہ لپیٹ سنڈی اری اور باسمتی دونوں اقسام پر یکساں حملہ آور ہوتی ہے۔

(جاری ہے)

انہوں نے بتایاکہ سفید پشت والا تیلا عموماً اری اقسام پر زیادہ حملہ کرتاہے لیکن اگر اری اقسام نہ ہوں تو یہ باسمتی اقسام پر حملہ کرکے اسے نقصان پہنچا سکتاہے۔ انہوں نے کہاکہ مذکورہ کیڑوں کے زیادہ حملہ کی صورت میں دھان کی فصل بالکل تباہ ہو جاتی ہے اور کٹائی کے قابل نہیں رہتی۔

انہوں نے بتایاکہ دھان کے جن کھیتوں میں پانی کھڑانہیں ہوتا وہاں گراس ہاپر حملہ کرکے فصل کو نقصان پہنچاتاہے اسلئے کاشتکار ان کیڑوں کا حملہ ہونے اور نقصان کی معاشی حدتک پہنچنے کی صورت میں اس کے کیمیائی انسدادکیلئے فوری طور پر محکمہ زراعت توسیع کے فیلڈسٹاف یا ماہرین زراعت کے مشورہ سے سفارش کردہ زہروں کا استعمال کریں تاکہ فصل کو نقصان سے بچایاجاسکے۔