جدید ٹیکنالوجی کے استعمال سے کھجور کو 10سال تک کیلئے بھی ذخیرہ کیاجاسکتا ہے، ماہرین اثمار آری

بدھ 30 جولائی 2025 15:12

فیصل آباد (اُردو پوائنٹ اخبارتازہ ترین - اے پی پی۔ 30 جولائی2025ء) ڈیٹ پام ریسرچ انسٹیٹیوٹ آری کے ماہرین اثمارنے کہا کہ ماہ مارچ اور اپریل کے مہینوں میں کھجور کے درختوں پر لگنے والے پھول کے باعث ماہ اگست کے آغاز میں کھجور کاپھل پکنا شروع ہو جاتاہے جسے جدید ٹیکنالوجی کے استعمال سے 10سال تک کیلئے بھی ذخیرہ کیاجاسکتاہے۔ انہوں نے بتایاکہ کھجور موسم گرما میں پک کر تیار ہوتی ہے اور جوں جوں گرمی کی شدت میں اضافہ ہوتاہے توں توں کھجور جلد سے جلد پک کر تیار ہونا شروع ہوجاتی ہے۔

انہوں نے کہا کہ کھجور ایک ایسا انمول تحفہ ہے جسے خشک کرکے بھی کئی سالوں کیلئے ذخیرہ کیاجاسکتاہے۔ انہوں نے بتایاکہ کھجور کی افادیت اپنی جگہ جبکہ کھجور کے درخت بھی بہت اہم خواص کے حامل ہوتے ہیں۔

(جاری ہے)

انہوں نے بتایا کہ کھجور کے تنے میں گھاؤ لگایاجائے تو اس سے انتہائی لذیز اور خوشبودار مواد برآمد ہوتاہے۔ انہوں نے بتایاکہ اسے عموماً اس وقت پیاجاتاہے جب اسے نکالاجائے۔

انہوں نے کہاکہ اگر تنے سے نکلے ہوئے مواد کو ایک دن کیلئے رکھ دیاجائے تواگلے روز لذیز اور خوشبودارمشروب کی صورت اختیار کر لیتاہے۔ انہوں نے کہاکہ کھجور کے پیڑ سے نکلنے والے گوند کو بیرونی چوٹوں کیلئے استعمال کیاجاتا ہے جبکہ گھٹنے پر بیرونی چوٹ کیلئے استعمال کی صورت میں بھی زبردست افاقہ حاصل ہوسکتاہے۔