Live Updates

کاشتکار مہنگائی کے دور میں گوبر کی کھاد کا استعمال کریں اور فصل سے زیادہ منافع کمائیں، سینئر فیلڈ آفیسر محکمہ زراعت سمبڑیال

بدھ 30 جولائی 2025 18:56

سمبڑیال (اُردو پوائنٹ اخبارتازہ ترین - اے پی پی۔ 30 جولائی2025ء) سینئر فیلڈ آفیسر محکمہ زراعت سمبڑیال لیاقت علی نے کہا ہے کہ کاشتکار مہنگائی کے دور میں گوبر کی کھاد کا استعمال کریں اور فصل سے زیادہ منافع کمائیں۔ ان خیالات کا اظہار انہوں نے بدھ کو یہاں ’’اے پی پی ‘‘سے گفتگو کرتے ہوئے کیا۔ انہوں نے کہا کہ گوبر کی کھاد کا استعمال پودوں کو غذائی اجزا کی فراہمی سمیت زمین کے طبعی و کیمیائی خواص کے لئے انتہائی اہمیت کا حامل ہے ۔

(جاری ہے)

انہوں نے کہا کہ کسانوں، کاشتکاروں، زمینداروں کو چاہیے کہ وہ گوبر کی کھاد سے بھر پور فائدہ اٹھانے کے لئے اس کا موثر استعمال یقینی بنائیں، گوبر کی کھاد یورین اور گوبر پر مشتمل ہوتی ہے، یورین میں موجود نائٹروجن یوریا کھاد جیسی کیمیائی شکل میں موجود ہوتی ہے لیکن گوبر کے ڈھیر کو کھلی شکل میں چھوڑ دینے کے باعث اس میں سے3 ہفتوں کے اندر اندر 90فیصد نائٹروجن ضائع ہو جاتی ہے۔انہوں نے کہا کہ گوبر کی کھاد جتنی زیادہ گلی سڑی ہو گی اس کے فوائد اتنے ہی زیادہ ہوں گے۔