مزدوروں کے بچوں کو اعلیٰ تعلیم فراہمی معاہدہ وزیراعلی ٰپنجاب کے ویژن کا عملی مظہر ہے، صوبائی وزیر لیبر

جمعرات 31 جولائی 2025 00:30

لاہور (اُردو پوائنٹ اخبارتازہ ترین - اے پی پی۔ 31 جولائی2025ء) وزیراعلیٰ پنجاب مریم نواز کے ویژن کے مطابق محنت کش طبقے کے بچوں کو اعلیٰ تعلیم کے مواقع فراہم کرنے کے لیے ایک اہم سنگِ میل عبور کر لیا گیا ، کامسیٹس یونیورسٹی اسلام آباد اور پنجاب ورکرز ویلفیئر فنڈ کے درمیان 43 سالہ لیز معاہدے پر دستخط ۔ترجمان کے مطابق اس تاریخی معاہدے پر صوبائی وزیر لیبر فیصل ایوب کھوکھر نے دستخط کر دیئے، معاہدے سے یونیورسٹی کے لاہور کیمپس میں مزدوروں کے بچوں کے لیے جدید تعلیم کی راہیں مزید ہموار ہوں گی۔

اس موقع پر ریکٹر کامسیٹس یونیورسٹی پروفیسر ڈاکٹر ساجد قمر سمیت یونیورسٹی کے اعلی افسران بھی موجود تھے۔صوبائی وزیر نے اس موقع پر کہا کہ یہ معاہدہ وزیراعلیٰ پنجاب کے اس ویژن کا عملی مظہر ہے جس کے تحت مزدور طبقے کے بچوں کو عالمی معیار کی تعلیم سے آراستہ کیا جا رہا ہے۔

(جاری ہے)

انہوں نے کہا کہ کامسیٹس جیسا بین الاقوامی شہرت یافتہ ادارہ جب حکومت پنجاب کے ساتھ قدم سے قدم ملا کر چلے گاتو محنت کش طبقے کے نوجوانوں کا مستقبل روشن تر ہوگا۔

فیصل ایوب کھوکھر نے بتایا کہ گزشتہ 24 سالوں کے دوران پنجاب ورکرز ویلفیئر فنڈ کے کوٹے کے تحت 8,790 طلبا و طالبات نے کامسیٹس یونیورسٹی سے گریجویشن مکمل کی اور ان طلبا کی 8 ارب روپے سے زائد کی فیس معاف کی گئی۔ صوبائی وزیر نے کہا کہ وزیراعلیٰ پنجاب کی قیادت میں موجودہ حکومت مزدور طبقے کی فلاح اور ان کے بچوں کی تعلیم کو اپنی اولین ترجیحات میں شامل رکھے ہوئے اور اس معاہدے کی توسیع اسی عزم کی بھرپور عکاسی کرتی ہے۔ریکٹر پروفیسر ڈاکٹر ساجد قمر نے حکومت پنجاب کے ترقی پسند ویژن کو سراہتے ہوئے کہا کہ اس لیز معاہدے کی توسیع سے کامسیٹس لاہور کیمپس میں کئی نئے تعلیمی منصوبے بھی جلد شروع کیے جائیں گے۔