یونیورسل سروس فنڈ کے تحت موبائل ٹاورز کی منظوری حاصل کر لی گئی ہے،جنرل سیکرٹری مسلم لیگ (ن) خیبر پختونخوا

جمعرات 31 جولائی 2025 15:00

ایبٹ آباد (اُردو پوائنٹ اخبارتازہ ترین - اے پی پی۔ 31 جولائی2025ء) سابق وفاقی وزیر اور جنرل سیکرٹری مسلم لیگ (ن)خیبر پختونخوا مرتضیٰ جاوید عباسی نے کہا ہے کہ یونیورسل سروس فنڈ (یو ایس ایف) کے تحت موبائل ٹاورز کی منظوری حاصل کر لی گئی ہے ،جس کے تحت ایبٹ آباد کے پسماندہ اور دور افتادہ علاقوں میں موبائل ٹاورز نصب کئے جائیں گے جس سے انٹرنیٹ کی سہولیات عوام تک پہنچ سکیں گی ۔

انہوں نے سوشل میڈیا اکائونٹ سے جاری بیان میں کہا کہ یہ منظوری خاص طور پر ان علاقوں کے لئے حاصل کی گئی ہے جہاں انٹرنیٹ کی سہولیات نہ ہونے کے برابر ہیں یا پھر شدید مسائل کا سامنا ہے، اس اقدام سے تعلیمی، معاشی اور سماجی ترقی کے نئے مواقع پیدا ہوں گے۔انہوں نے کہا کہ ایبٹ آباد کے دور افتادہ گائوں سموالہ بالا، منڈریاں، ستوڑہ، گھمبیر، لورہ، ماکول پائیں، دوماکی گلی، ماکول بالا نتھیاگلی، خانسپور، بیروٹ کلاں، بگلہ دروازہ شریف، کھن کلاں، پیخونکر ، پائیاں، مسینہ کلان، ککمنگ سیر گراں، درہ دلولہ، جبری نزد بانڈی پہاڑ، تھیسی حویلیاں، نر بیرن گلی برتاڑہ گلی، سبل ناڑائیں سربھنہ، نملی میرا، خان، ڈھوک دھمتوڑ نزد ڈھوک الفت، خالوالہ، نکگی، بٹنگی، جنڈکہ، کوٹھیالہ شیروان، پانڈو تھانہ، شہید آباد، کھنڈا کھو، کیگ ڑورہ اور کنگر بالا کو اس سکیم میں شامل کیا گیا ہے۔

(جاری ہے)

انہوں نے کہا کہ ڈیجیٹل دنیا میں رابطے کی سہولیات اب بنیادی انسانی حقوق میں شامل ہوتی جا رہی ہیں، ایسے میں جب طلبا آن لائن تعلیم، کاروباری حضرات ای ۔ کامرس اور عام شہری سوشل میڈیا اور دیگر پلیٹ فارمز کے ذریعہ دنیا سے جڑے رہنا چاہتے ہیں، انٹرنیٹ ایک بنیادی ضرورت بن چکا ہے۔