چینی باشندے کی چوری شدہ رقم میں خورد برد کا الزام ثابت، ایس ایچ او سمیت 7 اہلکار معطل

اتوار 3 اگست 2025 16:10

لاہور(اُردو پوائنٹ اخبارتازہ ترین - این این آئی۔ 03 اگست2025ء)چینی باشندے کے گھر سے چوری ہونے والی رقم برآمد ہونے کے بعد خورد برد کا الزام ثابت ہونے پر ایس ایچ او سمیت 7 پولیس اہلکاروں کو معطل کردیا گیا۔لاہور میں چینی باشندے کے گھر میں چوری کی واردات ہوئی، پولیس نے چوروں کو پکڑ کر مسروقہ رقم برآمد کرلی تاہم برآمدہ رقم میں خورد برد کی شکایت سامنے آئی جس کی انکوائری شروع کردی گئی۔

(جاری ہے)

پولیس انکوائری میں خورد برد ثابت ہونے پر ایس ایچ او سمیت 7 پولیس اہلکاروں کو معطل کردیا گیا، ایس ایس پی ڈیفنس شہر بانو نقوی نے افسر و اہلکاروں کی معطلی کی رپورٹ درج کرادی۔رپورٹ کے مطابق ایس ایچ او علی حسن نے اپنے ماتحت اہلکاروںکے ساتھ مل کر چینی شہری کی چوری شدہ رقم برآمدگی میں خوردبرد کی، چینی باشندے نے پولیس کی تفتیش اور برآمدگی سے متعلق شکایت کر رکھی تھی۔رپورٹ میں بتایا گیا ہے کہ چوروں نے چینی باشندے کے گھر سے ایک کروڑ 80 لاکھ روپے چوری کئے تھے، پولیس اہلکاروں نے برآمد کی گئی رقم میں سے ایک کروڑ 20 لاکھ روپے واپس کئے، 60 لاکھ روپے کی رقم خورد برد کرلی گئی۔