اساتذہ کی مسلسل تربیت تدریسی عمل کو مضبوط کرتی ہے،وائس چانسلر

اتوار 3 اگست 2025 17:10

کوئٹہ (اُردو پوائنٹ اخبارتازہ ترین - اے پی پی۔ 03 اگست2025ء) جامعہ بلوچستان کوئٹہ میں اساتذہ کی پیشہ ورانہ استعداد اور تدریسی معیار کو بہتر بنانے کے لیے منعقدہ 21 روزہ فیکلٹی ڈویلپمنٹ پروگرام کامیابی سے مکمل ہوگیا۔ ترجمان جامعہ بلوچستان کے بیان کے مطابق یہ پروگرام ہائر ایجوکیشن کمیشن ، فیکلٹی ٹریننگ اینڈ ڈیولپمنٹ سینٹر FTDC، جامعہ میر چاکر خان رند سبی، اور جامعہ بلوچستان کے باہمی اشتراک سے منعقد کیا گیا۔

اختتامی تقریب کے مہمانِ خصوصی وائس چانسلر جامعہ میر چاکر خان رند سبی پروفیسر ڈاکٹر ممتاز بلوچ جبکہ مہمانِ اعزاز پروفیسر ڈاکٹر زینب بی بی، ڈین فیکلٹی آف مینجمنٹ اینڈ انفارمیشن سائنسز، جامعہ بلوچستان تھیں۔ ایڈووکیٹ عبد القدوس رجسٹرار، جامعہ میر چاکر خان رندسبی، جناب نورالامین کاکڑ ڈائریکٹر FTDC اور ٹرینر محمد آصف جناب محمد صادق سمالانی، ڈائریکٹر تعلقات عامہ جناب محمد یوسف گل جناب نوید افتخار احمد ٹریننگ کوآرڈینیٹر نے بھی تقریب میں شرکت کی جبکہ فیکلٹی ممبران، ٹرینرز اور شرکاء کی بڑی تعداد موجود تھی۔

(جاری ہے)

تقریب کے اختتام پر تمام شرکاء کو سرٹیفکیٹس دیے گئے، جبکہ مہمانانِ خصوصی، ماہرین اور ٹرینرز کو اعزازی شیلڈز پیش کی گئیں۔اپنے خطاب میں وائس چانسلر پروفیسر ڈاکٹر ممتاز بلوچ اور پروفیسر ڈاکٹر زینب بی بی نے اس اقدام کو سراہتے ہوئے کہا کہ اساتذہ کی مسلسل تربیت نہ صرف تدریسی عمل کو مضبوط کرتی ہے بلکہ جامعات کو بین الاقوامی تعلیمی تقاضوں سے ہم آہنگ بھی کرتی ہے۔

پروگرام کے دوران مختلف جامعات کے ماہر اساتذہ، تجربہ کار پروفیسرز اور وائس چانسلرز نے تدریسی حکمتِ عملی، تحقیق، نصاب سازی، قیادت، اور اعلیٰ تعلیم کے جدید رجحانات پر سیشنز دیے۔پروگرام کے اختتام پر شرکاء نے اس عزم کا اظہار کیا کہ وہ حاصل کردہ مہارتوں کو اپنے اداروں میں بروئے کار لائیں گے اور علمی و تدریسی ترقی کے عمل کو آگے بڑھائیں گے۔