دبئی میں نئے ڈرائیونگ لائسنس کے اجراء کیلئے فیسوں کا اعلان

اگر کسی نے روڈ ٹیسٹ پاس کرنے کے باوجود ایک سال تک لائسنس حاصل نہیں کیا تو اسے دوبارہ ٹیسٹ پاس کرنا ہوگا

ساجد علی پیر 4 اگست 2025 15:01

دبئی میں نئے ڈرائیونگ لائسنس کے اجراء کیلئے فیسوں کا اعلان

دبئی ( اُردو پوائنٹ اخبارتازہ ترین۔ 04 اگست 2025ء ) دبئی روڈز اینڈ ٹرانسپورٹ اتھارٹی (آر ٹی اے) کی جانب سے نئے ڈرائیونگ لائسنس کے اجراء اور لرننگ پرمٹ سے متعلق فیسیں مقرر کردی گئیں۔ خلیجی اخبار الامارات الیوم کے مطابق آر ٹی اے نے موٹر سائیکل، لائٹ وہیکل اور لائٹ آٹومیٹک گاڑیوں کے لیے لرننگ پرمٹ کی فیس 100 درہم مقرر کی ہے، لائٹ اور ہیوی بسوں، مکینیکل مشینری اور ہیوی گاڑیوں کے لیے فیس 200 درہم ہو گی، محکمہ ٹریفک میں فائل کھولنے پر 200 درہم، سیف ڈرائیونگ گائیڈ فیس 50 درہم اور آئی ٹیسٹ کے لیے کم از کم 140 اور زیادہ سے زیادہ 180 درہم فیس مقرر کی گئی ہے۔

بتایا گیا ہے کہ ہر درخواست گزار کو 20 درہم انوویشن اور نالج فیس بھی ادا کرنا ہوگی، ڈرائیونگ لائسنس کے اجراء کے لیے 21 سال سے کم عمر افراد سے 100 درہم، 21 سال یا اس سے زیادہ عمر کے افراد سے 300 درہم فیس وصول کی جائے گی جس میں 20 درہم انوویشن فیس شامل ہے، اگر کوئی درخواست گزار ڈرائیونگ لائسنس کی کیٹگری کو مینول سے آٹو میٹک یا آٹو میٹک سے مینول میں تبدیل کرنا چاہے تو 200 درہم اضافی فیس اور 20 درہم انوویشن چارجز ادا کرنا ہوں گے۔

(جاری ہے)

روڈز ٹرانسپورٹ اتھارٹی کا کہنا ہے کہ اگر کسی شخص نے روڈ ٹیسٹ پاس کرنے کے باوجود ایک سال تک لائسنس حاصل نہیں کیا تو اسے دوبارہ ٹیسٹ پاس کرنا ہوگا جس میں 200 درہم لرننگ فائل فیس، 100 درہم لرننگ فارم، 50 درہم سیف ڈرائیونگ گائیڈ، 300 درہم لائسنس فیس، 200 درہم آر ٹی اے روڈ ٹیسٹ فیس اور 20 درہم انوویشن فیس شامل ہے، لائسنس کی منسوخی یا معطلی کی صورت میں دوبارہ امتحان دینے کے لیے 200 درہم فیس برائے آر ٹی اے ٹیسٹ، 200 درہم لرننگ فائل اوپننگ فیس، 100 درہم فارم فیس، 3 ہزار درہم ری ہیبلیٹیشن فیس اور آئی ٹیسٹ کی فیس 140 سے 180 درہم ہوگی۔