محکمہ زراعت ، اگست کے پہلے پندھرواڑے کے دوران دھان کی بہتر پیداوار کیلئے سفارشات جاری

پیر 4 اگست 2025 18:06

سیالکوٹ (اُردو پوائنٹ اخبارتازہ ترین - اے پی پی۔ 04 اگست2025ء) محکمہ زراعت نے اگست کے پہلے پندھرواڑے کے دوران دھان کی بہتر پیداوار کیلئے سفارشات جاری کردی ہیں۔پیر کو اسسٹنٹ ڈائریکٹر محکمہ زراعت توسیع سیالکوٹ رانا سلیم شاد نے اے پی پی کو بتایا کہ کاشتکاروں کی جانب سے دھان کی اچھی پیداوار حاصل کرنے کے لیے اگر کسی وجہ سے فصل میں نائٹروجنی کھاد کا استعمال مکمل نہیں ہو سکا تو جلد از جلد اسے مکمل کر لیں۔

پچھیتی کاشتہ فصل میں کھاد کا استعمال فصل کی صورتحال کے مطابق کریں۔انہوں نے مزید بتایا کہ دھان کے کاشتکار فصل پر نقصان دہ کیڑوں کے متوقع حملہ کے پیش نظر فصل کا باقاعدگی سے معائنہ کرتے رہیں اور پیسٹ سکاؤٹنگ کریں۔پتہ لپیٹ سنڈی کے حملہ کی صورت میں نقصان کی معاشی حد یعنی 2 عدد لپٹے ہوئے پتے فی پودا ہو جائے تو محکمہ زراعت پنجاب کے مقامی زرعی ماہرین کی سفارش کردہ زہروں کا استعمال کریں۔

(جاری ہے)

تنے کی سنڈیوں کے حملہ کی صورت میں نقصان کی معاشی حد یعنی سوک کی شرح 5 فیصد ہو جائے تو سفارش کردہ زہروں کا استعمال کریں۔ سفید پشتی بھورے تیلے کے حملہ کی صورت میں اگر نقصان کی معاشی حد یعنی 15 تا 20 فی پودا ہو جائے تو سفارش کردہ زہروں کا استعمال کریں۔ اس کے علاوہ ٹوکے کے حملہ کی صورت میں اگر نقصان کی معاشی حد 5 عدد فی نیٹ ہو جائے تو محکمہ زراعت پنجاب کے مقامی ماہرین کے سفارش کردہ زہروں کا استعمال کریں۔

دھان کے کاشتکار کھیت کے اندر اور اطراف میں وٹوں اور کھالوں پر جڑی بوٹیاں تلف کریں۔ انہوں نے مزید بتایا کہ دھان ایک غذائی فصل ہے۔دھان کے کاشتکار فصل پر کسی بھی زہر کے سپرے سے قبل محکمہ زراعت پنجاب کے مقامی ماہرین کے مشورہ سے وقفہ قبل از برداشت ضرور نوٹ کر لیں۔یاد رکھیں، دھان کی فصل پر اندھا دھند زہروں کے سپرے کی وجہ سے مارکیٹ میں درآمدی ویلیو میں کمی واقع ہوتی ہے۔