دھان کےکاشتکار نقصان دہ کیڑوں کے خلاف پیسٹ سکاؤٹنگ اور ماہرین کے مشورے سے زہروں کا استعمال کریں، محکمہ زراعت

پیر 4 اگست 2025 21:18

ملتان (اُردو پوائنٹ اخبارتازہ ترین - اے پی پی۔ 04 اگست2025ء) محکمہ زراعت پنجاب نے اگست کے پہلے پندھرواڑے کے دوران دھان کی فصل کی بہتر نگہداشت اور اعلیٰ پیداوار کے حصول کے لیےسفارشات جاری کر دی ہیں۔ ترجمان محکمہ زراعت کے مطابق اگر کسی وجہ سے نائٹروجنی کھاد کا استعمال مکمل نہ ہو سکا ہو تو کاشتکار فوری طور پر اسے مکمل کریں۔ جبکہ پچھیتی کاشتہ فصل میں کھادوں کا استعمال فصل کی حالت کو مدنظر رکھتے ہوئے کیا جائے۔

ترجمان نے مزید بتایا کہ دھان کے کاشتکارفصل کا باقاعدہ معائنہ کرتے رہیں اور کیڑوں کے ممکنہ حملے کی صورت میں فوری پیسٹ سکاؤٹنگ کریں۔پتہ لپیٹ سنڈی کے حملہ کی صورت میں اگر 2 عدد لپٹے ہوئے پتے فی پودا ہوں تو ماہرین کی تجویز کردہ زہروں کا استعمال کریں۔تنے کی سنڈی کے حملے پر اگر سوک کی شرح 5 فیصد ہو جائے تو زہریلا سپرے کیا جائے۔

(جاری ہے)

سفید پشتی بھورے تیلے کے حملے کی صورت میں اگر 15 تا 20 تیلے فی پودا پائے جائیں تو مناسب زہر استعمال کریں۔

ٹوکے کے حملے پر اگر نقصان کی حد 5 عدد فی نیٹ ہو تو فوری ایکشن لیا جائے۔ترجمان کے مطابق کاشتکار کھیتوں کے اندر اور اطراف میں جڑی بوٹیوں کی تلفی کو یقینی بنائیں تاکہ کیڑوں کی افزائش نہ ہو۔ترجمان نے واضح کیا کہ دھان ایک اہم غذائی فصل ہے، لہٰذا کسی بھی زہریلے سپرے کرنے سے پہلے وقفہ قبل از برداشت کا خیال رکھا جائے اور اس سلسلے میں محکمہ زراعت کے مقامی ماہرین سے مشورہ لیا جائے۔ دھان پر اندھا دھند سپرے کرنے سے فصل کی درآمدی ویلیو متاثر ہوتی ہے جو نہ صرف کسان بلکہ ملکی معیشت کے لیے بھی نقصان دہ ہے۔