سیالکوٹ،محکمہ زراعت کی ماہ اگست کے پہلے پندھرواڑے کے دوران کپاس کی بہتر نگہداشت کیلئے سفارشات جاری

سیالکوٹ (اُردو پوائنٹ اخبارتازہ ترین - اے پی پی۔ 05 اگست2025ء) محکمہ زراعت نے ماہ اگست کے پہلے پندھرواڑے کے دوران کپاس کی بہتر نگہداشت کیلئے سفارشات جاری کر دیں۔ منگل کو ترجمان محکمہ زراعت کے مطابق اگست کا مہینہ کپاس کی فصل کے لیے انتہائی اہم ہے،کاشتکار بارش کی صورت میں اگر زائد پانی کھیت میں کھڑا ہو جائے تو اس کی نکاسی کا بندوبست کریں۔

اس مقصد کے لیے کھیتوں کے ارد گرد چھوٹے تالاب یا کھالیاں بنائیں جہاں فصل پانی کھڑا رہنے کی وجہ سے کمزور حالت میں ہے وہاں بارش کے بعد میگنیشیم سلفیٹ بحساب 500 گرام اور 2 کلو گرام یوریا فی ایکڑ سپرے کریں۔ اس موسم کے دوران رس چوسنے والے کیڑے مثلاً چست تیلہ، سست تیلہ، سفید مکھی اور تھرپس تیزی سے افزائش نسل کرتے ہیں اور رس چوس کر فصل کو کمزور کر دیتے ہیں،نیزسنڈیوں کا حملہ بھی ہو جاتا ہے لہٰذا محکمہ زراعت توسیع کے مقامی زرعی ماہرین کی ہدایات کے مطابق ایسی سفارش کردہ زرعی زہریں استعمال کریں جو دوست کیڑوں کے تحفظ کے لیے محفوظ کیمسٹری والی ہوں۔

(جاری ہے)

ایک ہی کیمسٹری کی زرعی زہروں کے بار بار استعمال سے گریز کریں۔کپاس کی فصل پر پائر یتھرائڈ گروپ کی زہروں کے استعمال سے گریز کریں تاکہ سفید مکھی کا حملہ بڑھ نہ جائے۔گلابی سنڈی کے حملے کا بروقت پتہ لگانے کے لیے ہفتہ میں دو بار کپاس کی فصل کی پیسٹ سکاؤٹنگ کریں۔گلابی سنڈی کی مانیٹرنگ کے لیے روشنی یا جنسی پھندوں کا استعمال کریں۔اگر گلابی سنڈی کے پروانوں کی تعداد جنسی پھندے میں 5 پروانے تین لگاتار راتیں آجائیں تو سفارش کردہ نئی کیمسٹری کی زہروں کا سپرے محکمہ زراعت کے مقامی عملہ کے مشورہ سے کریں اور سپرے 7 دن کے وقفہ سے دوبارہ کریں۔

کپاس کی چنائی صبح 10 بجے شروع کریں جس وقت فصل اور ٹینڈوں پر سے رات کی شبنم خشک ہو جائے تاکہ کپاس بد رنگ نہ ہونے پائے اور نمی کی وجہ سے جننگ کے دوران مشکلات کا سامنا بھی نہ ہو۔چنائی ہمیشہ پودے کے نچلے حصے سے مکمل کھلے ہوئے ٹینڈوں سے شروع کریں اور بتدریج اوپر کو چنائی کرتے جائیں تاکہ پودے کے سوکھے پتے چنی ہوئی کپاس میں شامل نہ ہوں۔چنائی کے بعد پھٹی کو ایک دو دھوپ ضرور لگوائیں تاکہ نمی کو مناسب سطح پر لایا جا سکے۔