متحدہ عرب امارات کا آٹھواں بحری جہاز غزہ کےلیے امداد لے کر مصر پہنچ گیا

بدھ 6 اگست 2025 08:30

دبئی، قاہرہ (اُردو پوائنٹ اخبارتازہ ترین - اے پی پی۔ 06 اگست2025ء) متحدہ عرب امارات کی فلسطینی عوام کے لیے جاری انسانی ہمدردی کی مہم کے تحت آٹھواں امدادی بحری جہاز ’خلیفہ‘ مصر کی العریش پورٹ پر پہنچ گیا۔وام کے مطابق یہ بحری جہاز اب تک امارات کی جانب سے روانہ کیے گئے امدادی جہازوں میں سب سے بڑا ہے، جو غزہ کی پٹی میں امداد پہنچانے کی تیاریوں کا ایک اہم مرحلہ ہے۔

العریش پورٹ پر انسانی و فلاحی اداروں کے نمائندہ وفد نے بحری جہاز کا خیرمقدم کیا ۔ امارات ریڈ کریسنٹ کے سیکرٹری جنرل احمد ساری المزروعی اور مصری حکام بھی موجود تھے۔اس پر7 ہزار 166 ٹن امدادی سامان لدا ہے، جس میں 4 ہزار 372 ٹن خوراک، ایک ہزار433 ٹن شیلٹرز میٹریل، 860 ٹن طبی سامان اور 501 ٹن ہیلتھ سپلائز شامل ہیں۔

(جاری ہے)

اماراتی حکام کے مطابق آٹھویں بحری جہاز کی روانگی کے بعد غزہ بھیجے جانے والے امدادی سامان کا مجموعی حجم بڑھ کر 80 ہزار ٹن سے تجاوز کر گیا ہے۔

متحدہ عرب امارات غزہ کی پٹی مں بڑھتے ہوئے انسانی بحران اور مشکل ترین حالات میں بھی فلسطینی عوام کو انسانی و امدادی امداد فراہم کرنے کے اپنے پختہ مؤقف پر قائم ہے۔ یہ اقدام متحدہ عرب امارات کی قیادت کی جانب سے انسانی ہمدردی کے اقدامات کا حصہ ہے۔یاد رہے امارات کے صدر شیخ محمد بن زاید آل نہیان کی ہدایت پرغزہ متاثرین کےلیے امدادی مہم چلائی جا رہی ہے۔