بٹ کوئن کی قیمت تاریخ کی بلند ترین سطح سے تجاوز کر گئی

اتوار 5 اکتوبر 2025 11:10

ماسکو (اُردو پوائنٹ اخبارتازہ ترین - اے پی پی۔ 05 اکتوبر2025ء) ڈیجیٹل کرنسی ’’ بٹ کوئن‘‘ کی قیمت تاریخ کی بلند ترین سطح ایک لاکھ 25 ہزار ڈالر سے تجاوز کر گئی۔رائٹرز کے مطابق اتوار کی صبح کرپٹو کرنسی ایکسچینج پر بٹ کوئن کی قیمت اپنی تاریخ کی بلند ترین سطح پر ریکارڈ کی گئی اور بٹ کوئن ایک لاکھ 25 ہزار 245 ڈالر میں ٹریڈ ہوا ، اس سے پہلے رواں سال 14جولائی کو بٹ کوئن کی قیمت نے اپنی نئی بلند ترین سطح حاصل کی تھی جب ایک بٹ کوئن ایک لاکھ 22 ہزار 445 ڈالر میں ٹریڈ ہوا ۔

بٹ کوئن ایک ڈی سنٹرلائزڈ کرپٹو کرنسی نظام ہے جو بلاک چین ٹیکنالوجی پر مبنی ہے اور اسے نظام میں شامل کوئی بھی صارف مائن کر سکتا ہے، حالیہ برسوں میں بٹ کوئن کی مقبولیت میں زبردست اضافہ ہوا ہے تاہم مارکیٹ میں بٹ کوئن کی تعداد محدود ہے اور زیادہ تر بٹ کوئنز پہلے ہی "مائن" کئے جا چکے ہیں۔

(جاری ہے)

بٹ کوئن کو 2009 میں متعارف کروایا گیا اور اس وقت اس کی قیمت 0.09 ڈالر تھی۔

2011 میں اس کی قیمت 26.90 ڈالر تک پہنچ گئی اور 2014 کے آغاز میں اس کی قیمت 1238 ڈالر ریکارڈ کی گئی جس کے بعد اس کی قیمت میں تیزی سے کمی آئی اور 2014 کے اختتام تک یہ 315.21 ڈالر تک گر گئی، 18-2017 کے دوران اس کی قیمت میں تیزی سے اضافہ ہوا اور دسمبر 2018 میں یہ 20 ہزار ڈالر تک پہنچ گئی۔ دسمبر 2019 میں اس کی قیمت ایک بار پھر گراوٹ کا شکار ہوئی اور 6635 ڈالر تک گر گئی تاہم دسمبر 2021 میں بٹ کوئن پہلی بار 49 ہزار کی حد سے تجاوز کر گیا، دسمبر 2022 میں اس کی قیمت کم ہو کر 18 ہزار اور نومبر 2024 میں 77 ہزار ڈالر تک پہنچی۔