ٹرین میں مسافروں سے پیسے اکٹھے کرنے والا جعلی ریلوے ملازم گرفتار

بدھ 6 اگست 2025 18:19

لاہور (اُردو پوائنٹ اخبارتازہ ترین - این این آئی۔ 06 اگست2025ء) ریلویز پولیس لاہور نے جعلی ریلوے ملازم گرفتار کرلیا ۔ترجمان ریلوے پولیس کے مطابق ملزم ولید ٹرین نارووال پسنجر کے مسافروں سے ٹکٹ کی مد میں پیسے اکٹھے کرتا تھا، چند روز قبل وائرل ہونے والی ویڈیو میں ملزم خود کو ریلوے ملازم ظاہر کرکے مسافروں سے پیسے وصول کر رہا تھا۔

(جاری ہے)

ملزم ٹرین نارووال پسنجر میں شاہدرہ کے قریب اونچی آواز میں مسافروں سے ٹکٹ اور پیسوں کا مطالبہ کرتا رہا،ویڈیو کلپ منظر عام پر آنے کے فوری بعد ریلویز پولیس لاہور نے مقدمہ درج کرکے ملزم کی کھوج شروع کردی، ریلویز پولیس نے جدید تفتیشی مہارت کو بروئیکار لاتے ہوئے ملزم کو اسکے آبائی علاقے نارنگ منڈی سے گرفتار کرلیا۔

ترجمان کے مطابق ملزم اس سے پہلے جعلی ریلوے ملازم بن کر ایسی متعدد وارداتوں میں ملوث رہ چکا ہے۔ ڈی آئی جی نارتھ نے ملزم کی کامیاب گرفتاری پر ایس ایچ او لاہور اور اسکی ٹیم کو شاباش دی ہے ۔