کاجول کا ہندی میں بات کرنے سے انکار، بھارتی تلملا اٹھے

اگر ہندی بولنے میں شرم آتی ہے تو پھر ہندی فلموں میں کام کرنا بند کر دیں،صارفین

جمعرات 7 اگست 2025 11:44

کاجول کا ہندی میں بات کرنے سے انکار، بھارتی تلملا اٹھے

ممبئی (اُردو پوائنٹ اخبارتازہ ترین - این این آئی۔ 07 اگست2025ء)بالی ووڈ کی مشہور اداکارہ کاجول نے ہندی میں بات کرنے سے انکار کردیا، جس پر انہیں شدید تنقید کا نشانہ بنایا جا رہا ہے۔اداکارہ کاجول ایک بار پھر خبروں میں ہیں لیکن اس بار اپنی کسی فلم کی وجہ سے نہیں بلکہ ہندی زبان سے متعلق اپنے رویے پر تنقید کا سامنا کر رہی ہیں۔بھارتی میڈیا کے مطابق یہ واقعہ 5 اگست کو ممبئی میں ہونے والے ’’مہاراشٹرا اسٹیٹ فلم ایوارڈز 2025‘‘کے دوران پیش آیا، جہاں کاجول نے میڈیا سے گفتگو کے دوران ہندی زبان میں بات کرنے سے انکار کردیا۔

ایوارڈ تقریب میں اپنی والدہ، سینئر اداکارہ تنوجا کے ہمراہ شرکت کرنے والی کاجول میڈیا کے سوالات کا جواب بنیادی طور پر میراٹھی اور انگریزی زبان میں دے رہی تھیں۔

(جاری ہے)

جب ایک رپورٹر نے ان سے درخواست کی کہ وہ اپنا بیان ہندی میں بھی دہرائیں تو کاجول برہمی کا اظہار کرتے ہوئے بولیںابھی میں ہندی میں بولوں جس کو سمجھنا ہے وہ سمجھ لیں گے۔اداکارہ کی ویڈیو سوشل میڈیا پر تیزی سے وائرل ہوگئی اور متعدد صارفین نے کاجول کے رویے کو تکبراوردوغلا پن قرار دیتے ہوئے شدید تنقید کی۔

سوشل میڈیا پر ردعمل دیتے ہوئے ایک صارف نے لکھا کہ ہندی سے اداکارہ بنی، اب میراٹھی بول کر نیتا بن رہی ہیں۔ شرمناک‘ایک اور صارف نے تبصرہ کرتے ہوئے کہا کہ اگر ہندی بولنے میں شرم آتی ہے تو پھر ہندی فلموں میں کام کرنا بند کر دیں۔کئی صارفین نے یہ سوال بھی اٹھایا کہ اگر وہ ہندی زبان کا احترام نہیں کرتیں تو پھر وہ مراٹھی یا دیگر زبانوں کی فلموں تک محدود کیوں نہیں رہتیں۔خیال رہے کہ اس تقریب میں کاجول کو ’’راج کپور ایوارڈ‘‘سے نوازا گیا، جو ان کے فلمی کیریئر میں خدمات کے اعتراف میں دیا گیا۔ انہوں نے ایوارڈ وصول کرنے کے بعد بھی اپنی تقریر میراٹھی زبان میں کی۔