پنجاب میں گندم کاشتکاروں کیلئے 100 ارب کے بلاسود قرضوں کی تجویز منظور

وزیراعلیٰ مریم نواز کی زیر صدارت اجلاس، چھوٹے کاشتکار کیلئے ٹارگٹڈ سبسڈی اور سہولیات فراہم کرنے کی ہدایت

ہفتہ 9 اگست 2025 22:18

لاہور (اُردو پوائنٹ اخبارتازہ ترین - آن لائن۔ 09 اگست2025ء) گندم کی کاشت سے قبل کاشتکاروں کو سہولت فراہم کرنے کے لیے 100 ارب روپے کے بلاسود قرض دینے کی تجویز پر اتفاق کر لیا گیا ہے، تاکہ فصل کی بہتر پیداوار اور زرعی شعبے کی ترقی کو یقینی بنایا جا سکے۔تفصیلات کے مطابق حکومت پنجاب نے گندم کے کاشتکاروں کی معاونت اور پیداوار میں اضافے کے لیے جامع پلان طلب کیا ہے، جبکہ گندم کی بوائی سے قبل زرعی مداخل کی لاگت میں کمی کے اقدامات کی ہدایت بھی جاری کی گئی ہے۔

(جاری ہے)

وزیراعلیٰ مریم نواز نے کھاد کی وافر دستیابی اور چھوٹے کاشتکاروں کو ریلیف کے لیے ٹارگٹڈ سبسڈی دینے کی ہدایت کی۔بریفنگ میں بتایا گیا کہ پنجاب میں گندم کی بہتر پیداوار کے لیے بروقت بوائی نہایت ضروری ہے۔ گزشتہ دو ماہ میں کاشتکاروں کو 63 ارب روپے کی سبسڈی دی گئی، کسان کارڈ کے ذریعے 50 ارب روپے کے بلاسود قرض فراہم کیے گئے، جبکہ گندم سپورٹ پروگرام کے تحت 13 ارب روپے سبسڈی دی گئی۔ وزیراعلیٰ مریم نواز نے کہا کہ گندم کے کاشتکار کو اکیلا نہیں چھوڑیں گے، حکومت ہر ممکن تعاون فراہم کرے گی۔