گلیات میں سیاحت، ثقافت و ترقیاتی امور پر اجلاس ،پارکنگ، پانی بحران اور نئے سیاحتی مقامات پر غور

ہفتہ 9 اگست 2025 20:10

پشاور(اُردو پوائنٹ اخبارتازہ ترین - این این آئی۔ 09 اگست2025ء)گلیات میں خیبرپختونخوا اسمبلی کی اسٹینڈنگ کمیٹی برائے کلچر، ٹورازم، آرکیالوجی اینڈ میوزیم کا اہم اجلاس منعقد ہوا، جس کی صدارت کمیٹی کے چیئرمین و رکن صوبائی اسمبلی شرافت علی نے کی۔ اجلاس میں دیگر اراکین اسمبلی اور گلیات ڈویلپمنٹ اتھارٹی (جی ڈی ای) کے افسران نے بھی شرکت کی۔اجلاس میں گلیات کے ترقیاتی امور اور مسائل پر تفصیلی غور و خوض کیا گیا۔

زیر بحث موضوعات میں پارکنگ کے مسائل، پانی کی قلت، نئے سیاحتی مقامات کی نشاندہی، جی ڈی اے ٹاؤن منصوبہ، کیمپنگ گراؤنڈز کی تیاری اور سڑکوں کی مرمت کے لیے سول لیب کے قیام شامل تھے۔اجلاس کو بتایا گیا کہ علاقے میں پانی کے نئے ذرائع تلاش کیے جا رہے ہیں، جبکہ حال ہی میں مقامی کمیونٹی، ویلج کونسل چیئرمینز، سماجی شخصیات اور انفلوئنسرز کے تعاون سے 14 ہزار سے زائد پودے لگائے گئے ہیں۔

(جاری ہے)

اس کے ساتھ ساتھ تجاوزات کے خلاف آپریشن بھی کیا گیا اور متعدد ہوٹلوں پر جرمانے عائد کیے گئے۔مزید برآں، گلیات میں نئے ہائیکنگ ٹریکس کی نشاندہی کی گئی ہے جہاں سیاحوں کے ساتھ مل کر صفائی مہم جاری ہے۔ مختلف مقامات پر میڈیکل کیمپس کا انعقاد بھی عمل میں لایا گیا۔ اجلاس میں گلیات ڈویلپمنٹ اتھارٹی کو درپیش چیلنجز، بالخصوص پانی کے بحران کے حل کے لیے فوری اقدامات پر زور دیا گیا۔