آسٹریلیا اور جنوبی افریقا کی کرکٹ ٹیموں کے درمیان دوسرا ٹی 20 میچ 12 اگست کو ڈارون میں کھیلا جائے گا،کینگروز کو سیریز میں 0-1 کی برتری حاصل

پیر 11 اگست 2025 13:59

کینبرا(اُردو پوائنٹ اخبارتازہ ترین - این این آئی۔ 11 اگست2025ء)آسٹریلیا اور جنوبی افریقا کی کرکٹ ٹیموں کے درمیان تین ٹی -20 میچوں کی سیریز کا دوسرا میچ 12 اگست (منگل) کو مرارا کرکٹ گراؤنڈ ڈارون کے مقام پر کھیلا جائے گا، میزبان آسٹریلوی ٹیم کو پروٹیز کے خلاف 0-1 کی برتری حاصل ہے، کینگروز نے پہلے ٹی ٹونٹی میچ میں پروٹیز ٹیم کو 17 رنز سے شکست دی تھی۔

جنوبی افریقا کی ٹیم اپنے دورہ آسٹریلیا کے دوران میزبان ٹیم کے خلاف تین ٹی ٹونٹی اور تین ایک روزہ بین الاقوامی میچوں کی سیریز کھیلے گی۔تین ٹی -20 میچوں کی سیریز کا ایک میچ کھیلا جا چکا ہے جو میزبان ٹیم نے جیت لیا تھا۔جنوبی افریقا اور آسٹریلیا کی ٹیموں کے درمیان دوسرا ٹی ٹونٹی میچ 12 اگست کو اسی مقام مرارا کرکٹ گراؤنڈ میں جبکہ تیسرا اور آخری ٹی ٹونٹی میچ 16 اگست کو کازلی سٹیڈیم کیرنز میں کھیلا جائے گا۔

(جاری ہے)

تین ٹی ٹونٹی میچوں کی سیریز کے تمام میچز نائٹ ہوں گے اور فلڈ لائٹس میں کھیلے جائیں گے۔ٹی ٹونٹی سیریز میں جنوبی افریقا کی ٹیم کو مایہ ناز آل رائونڈر ایڈن کائل مارکرم جبکہ آسٹریلوی ٹیم کو مچل مارش لیڈ کریں گے۔ٹی ٹونٹی سیریز مکمل ہونے کے بعد جنوبی افریقا کی ٹیم اسی مقام کازلی کا سٹیڈیم سے تین ون ڈے میچوں کی سیریز کا آغاز 19 اگست کو پہلے ون ڈے میچ سے کرے گی۔ باقی دونوں ون ڈے میچز بالترتیب 22 اور 24 اگست کو گریٹ بیریئر ریف ایرینا میکیکے مقام پر کھیلے جائیں گے۔ تینوں ایک روزہ میچز ڈے اینڈ نائٹ ہوں گے۔