ٹاپ سیڈڈ جینک سنر سنسناٹی اوپن ٹینس مینز سنگلز کے تیسرے رائونڈ میں پہنچ گئے

پیر 11 اگست 2025 14:05

اوہائیو(اُردو پوائنٹ اخبارتازہ ترین - این این آئی۔ 11 اگست2025ء)اٹلی کے نامور ٹینس سٹار، عالمی نمبر ون اور ایونٹ کے دفاعی چیمپئن جینک سنر،امریکا کے ٹینس کھلاڑی ٹیلر فریٹز اور یونانی ٹینس سٹار سٹیفانوس سنسناٹی اوپن ٹینس ٹورنامنٹ کا فاتحانہ آغاز کرتے ہوئے مردوں کے سنگلز مقابلوں کے تیسرے رائونڈ میں پہنچ گئے۔23 سالہ اطالوی ٹینس سٹار نے مردوں کے سنگلز مقابلوں کے دوسرے رائونڈ میں کولمبین حریف کھلاڑی دانیال الٰہی گیلان ریوروس کو شکست دی تھی۔

ایک اور میچ میں امریکی ٹینس سٹار ٹیلر فریٹز نے دوسرے رائونڈ میچ میں ہم وطن حریف کھلاڑی ایمیلیو ناوا کو شکست دے کر تیسرے رائونڈ کے لئے کوالیفائی کیا۔امریکی ریاست اوہائیو کے شہر سنسناٹی میں جاری ایونٹ میں کانٹے دار مقابلوں کا سلسلہ جاری ہے جس میں شائقین ٹینس کو انتہائی دلچسپ مقابلے دیکھنے کو مل رہے ہیں۔

(جاری ہے)

مردوں کے سنگلز مقابلوں کے دوسرے رائونڈ میں اٹلی کے جینک سنر نے شاندار کارکردگی کا مظاہرہ کرتے ہوئے کولمبین حریف کھلاڑی دانیال الٰہی گیلان ریوروس کو سٹریٹ سیٹس میں 1-6 اور 1-6 سے ہرا کر تیسرے رائونڈ کے لئے کوالیفائی کرلیا۔

ایک اور میچ میں 27 سالہ امریکی ٹینس سٹار ٹیلر فریٹز نے دوسرے رائونڈ میچ میں عمدہ کھیل پیش کرتے ہوئے ہم وطن حریف کھلاڑی ایمیلیو ناوا کو سٹریٹ سیٹس میں 4-6 اور 4-6سے ہرا کر تیسرے رائونڈ کے لئے کوالیفائی کرلیا۔یونانی ٹینس سٹار نے بھی دوسری رکاوٹ عبور کر لی،انہوں نے دوسرے رائونڈ میچ میں ہنگری کے حریف کھلاڑی فیبیان ماروزان کو 6-7(3-7)اور 2-6 سے شکست دے کر تیسرے رائونڈ کے لئے کوالیفائی کیا۔ ایونٹ کے تیسرے رائونڈ میں جینک سنر کا مقابلہ کینیڈین حریف کھلاڑی گیبریل ڈیالو سے ہوگا۔