ترکیہ میں 6.1 شدت کا زلزلہ، ایک شخص جاں بحق ، درجنوں زخمی

پیر 11 اگست 2025 15:24

ترکیہ میں 6.1 شدت کا زلزلہ،   ایک شخص جاں بحق ، درجنوں زخمی
انقرہ (اُردو پوائنٹ اخبارتازہ ترین - اے پی پی۔ 11 اگست2025ء) ترکیہ کے صوبہ بالیک ایسیر کے ضلع سندرگی میں 6.1 شدت کے زلزلے کے جھٹکے محسوس کئے گئے جس کے نتیجے میں ایک شخص جاں بحق درجنوں زخمی ہو گئے ۔ اے ایف پی کے مطابق ترک ڈیزاسٹر مینجمنٹ ایجنسی ( اے ایف اے ڈی ) نے کہا ہے کہ گزشتہ شام کو ضلع سندرگی میں 6.1 شدت کے زلزلے کے جھٹکے محسوس کئے گئے ، زلزلے کے جھٹکے استنبول اور ازمیر کے سیاحتی مقام سمیت ملک کے مغرب میں کئی شہروں میں بھی محسوس کیے گئے۔

زلزلے کا مرکز صوبہ بالیک ایسیر کے ضلع سندرگی میں تھا۔ ترک وزیر داخلہ علی یرلیکایا نے زلزلے کے مرکز سندرگی میں صحافیوں کو بتایا کہ زلزلے کے باعث 81 سالہ شخص جاں بحق ہو گیا اور 29 افراد زخمی ہوئے ہیں، لیکن ان کی حالت سنگین نہیں ہے۔

(جاری ہے)

انہوں نے کہا کہ زلزلے سے سندرگی اور اس کے اطراف میں 16 عمارتیں منہدم ہوئیں، جن میں سے4آباد تھیں، جن میں شہر کے مرکز میں ایک تین منزلہ عمارت بھی شامل تھی۔

تین منزلہ عمارت کے ملبے سے کئی لوگوں کو زندہ نکال لیا گیا ہے ، جہاں چھ افراد رہائش پذیر تھے۔ قبل ازیں میئر سندرگی سیرکان ساک نے کہا کہ ملبے سے 4 افراد کو بچا لیا گیا ہے جبکہ 2 کو نکالنے کی کوششیں جاری ہیں۔ ترک ڈیزاسٹر مینجمنٹ ایجنسی نے کہا کہ زلزلے سے متاثرہ علاقے میں 319 امدادی اہلکار تعینات کئے گئے ۔

متعلقہ عنوان :