نریندرمودی جدید دورکے ”راون“ ہیں، کانگریس رہنما ادت راج

ہفتہ 4 اکتوبر 2025 14:50

نئی دہلی (اُردو پوائنٹ اخبارتازہ ترین - اے پی پی۔ 04 اکتوبر2025ء) کانگریس کے رہنما ادت راج نے وزیر اعظم نریندر مودی کے طرز حکمرانی خاص طور پر معاشی پالیسیوں پر کڑی تنقید کرتے ہوئے انہیں جدید دور کا ”راون“قرار دیا ہے۔ کشمیر میڈیاسروس کے مطابق ادت راج نے ”ایکس “ پر جاری بیان میں کہا ہے کہ مودی نے بھارت کے مینو فیکچرنگ شعبے کو کمزور کر دیا اور درآمدات پر ملک کا انحصار بڑھا دیا۔

انہوں نے کہا کہ نریندر مودی جدید راون کی علامت ہیں اور جس طرح وہ سونے کا محل بنا رہے ہیں ،اس میں داخل ہوتے ہی وہ اسے جل اٹھتا دیکھیں گے۔ ادت راج نے کہا کہ آج کے روان مودی کی پالیسیوں نے ہماری پروڈکیشن کو کمزور کر دیا اور چین پر ہمار انحصار بڑھا دیا ہے۔ انہوں نے آر ایس ایس کے صد سالہ جشن کے موقع پر وزیر اعظم مودی کی طرف سے جاری کیے گئے ڈاک ٹکٹ اور سکے کے حوالے سے بات کرتے ہوئے کہا کہ آج جو لوگ اقتدار میں ہیں وہ من مانی کر رہے ہیں لیکن جس دن کانگریس اقتدار میں آئے گی تو وہ مذکورہ ڈاک ٹکٹ اور سکے منسوخ کرے گی۔

(جاری ہے)

ادت راج نے مزید کہا کہ آر ایس ایس کی بنیاد ہی دلت اور پسماندہ طبقے کے خلاف رکھی گئی تھی ۔ یاد رہے کہ ”راون“ ہندو مذہب کی دیومالائی کہانی رامائن کا مرکزی اور بنیادی کردار ہے جس میں اسے لنکا کا بادشاہ اور رام کا حریف دکھایا گیا ہے، جو راکھشس کے طور پر مشہور ہے۔