Live Updates

سرگودھا،ضلعی انتظامیہ کی یکم سے 10 اگست تک پرائس کنٹرول مجسٹریٹس کی کارکردگی بارے رپورٹ جاری

پیر 11 اگست 2025 18:03

سرگودھا (اُردو پوائنٹ اخبارتازہ ترین - اے پی پی۔ 11 اگست2025ء) ضلعی انتظامیہ سرگودھانےیکم سے10اگست 2025ء تک پرائس کنٹرول مجسٹریٹس کی کارکردگی رپورٹ جاری کر دی جس کے مطابق مہنگائی اورگراں فروشی کے خلاف جاری مہم میں خاطر خواہ پیش رفت ہوئی ہے۔رپورٹ میں بتایا گیا ہے کہ اس عرصے کے دوران پرائس کنٹرول مجسٹریٹس نے ضلع بھر میں 58 ہزار 109 انسپکشنز کیں،ان کارروائیوں میں نرخنامے کی خلاف ورزی، گراں فروشی اور دیگر بے ضابطگیوں پر 8 لاکھ 49 ہزار روپے کے جرمانے عائد ،9 ایف آئی آرز درج ، 26 افراد گرفتار جبکہ 4 کاروباری مراکز کو سیل کر دیا گیا۔

ڈپٹی کمشنر کیپٹن ریٹائرڈ محمد وسیم نے کہا کہ عوام کو مہنگائی سے ریلیف فراہم کرنے کے لیے ضلعی انتظامیہ بھرپور اقدامات کر رہی ہے۔

(جاری ہے)

اُنہوں نے کہا سرگودھا میں مصنوعی مہنگائی اور ذخیرہ اندوزی کے خلاف زیرو ٹالرنس پالیسی اپنائی گئی ہے، پرائس کنٹرول مجسٹریٹس کو سخت ہدایات دی گئی ہیں کہ خلاف ورزی کے مرتکب عناصر کے خلاف فوری اور موثر کارروائی کی جائے۔ان کا کہنا تھا کہ عوام کو ریلیف فراہم کرنا ضلعی انتظامیہ کی اولین ترجیح ہے اور اس ضمن میں روزانہ کی بنیاد پر مانیٹرنگ جاری ہے۔ڈپٹی کمشنر نے شہریوں سے اپیل کی کہ وہ کسی بھی دکان یا بازار میں نرخنامے سے زائد قیمت وصول کیے جانے کی شکایت فوری طور پر متعلقہ حکام تک پہنچائیں تاکہ بروقت کارروائی ممکن ہو سکے۔