جیکب آباد کے مختلف علاقوں میں دو الگ الگ پولیس مقابلے، دو ملزمان زخمی حالت میں گرفتار

پیر 11 اگست 2025 18:18

جیکب آباد (اُردو پوائنٹ اخبارتازہ ترین - این این آئی۔ 11 اگست2025ء) جیکب آباد کے مختلف علاقوں میں دو الگ الگ پولیس مقابلے، دو ملزمان زخمی حالت میں گرفتار، اسلحہ برآمد۔ تفصیلات کے مطابق جیکب آباد میں پولیس اور جرائم پیشہ عناصر کے درمیان دو الگ الگ مقابلوں کے دوران دو ملزمان زخمی حالت میں گرفتار کر لیے گئے جبکہ ان کے قبضے سے غیر قانونی اسلحہ برآمد ہوا۔

پہلا پولیس مقابلہ تھانہ مولاداد کی حدود دمب تھرڑی کے قریب پیش آیا جہاں پولیس اور ملزمان کے درمیان فائرنگ کے تبادلے میں ایک ملزم زخمی ہوگیا گرفتار زخمی کی شناخت محمد سلیم ولد گھرام جمالی سکنہ جعفرآباد بلیدی کے نام سے ہوئی اس کے تین ساتھی موقع سے فرار ہوگئے جن کی گرفتاری کے لیے ناکہ بندی کی گئی ہے ملزم کے قبضے سے ایک بغیر لائسنس پستول برآمد کیا گیا۔

(جاری ہے)

دوسرا پولیس مقابلہ تھانہ گڑہی خیرو کی حدود بھٹی بائے پاس کے قریب ہوا جہاں پولیس نے فائرنگ کے تبادلے کے بعد ایک اور ملزم کو زخمی حالت میں گرفتار کیا زخمی ملزم کی شناخت حسام الدین ولد نظام الدین عرف حضور بخش سکنہ ابدال شاخ ضلع شکارپور کے نام سے ہوئی اس کے دو ساتھی فرار ہوگئے، جن کی تلاش کے لیے کارروائیاں جاری ہیں ملزم کے قبضے سے بھی ایک بغیر لائسنس پستول برآمد ہوا، دونوں زخمی ملزمان کو علاج کے لیے قریبی ہسپتال منتقل کردیا گیا ہے پولیس کے مطابق فرار ملزمان کی گرفتاری کے لیے چھاپے مارے جارہے ہیں۔