ڈی جی سپورٹس پنجاب نے انٹرڈویژن پنجاب وومن ہاکی ٹورنامنٹ کا افتتاح کردیا

خضرافضال چودھری کا پرتپاک استقبال کیاگیا ، کھلاڑیوں اور آفیشلز کے ساتھ تعارف کروایا گیا اور گروپ فوٹوز بھی بنوائے گئے انٹرڈویژن ہاکی ٹورنامنٹ آئندہ ماہ ہونیوالی نیشنل یوتھ گیمز اور نیشنل گیمزکراچی کیلئے پنجاب کی ٹیم کا انتخاب کرنے میں کارآمد ثابت ہوگا

پیر 11 اگست 2025 21:40

لاہور (اُردو پوائنٹ اخبارتازہ ترین - این این آئی۔ 11 اگست2025ء) ڈائریکٹرجنرل سپورٹس پنجاب خضرافضال چودھری نے انٹرڈویژن پنجاب وومن ہاکی ٹورنامنٹ کا افتتاح کردیا ، پیر کے روز رنگا رنگ افتتاحی تقریب میںنیشنل ہاکی سٹیڈیم پہنچنے پر ڈی جی سپورٹس پنجاب کا پرتپاک استقبال کیاگیا،کھلاڑیوں اور آفیشلز کے ساتھ تعارف کروایا گیا اور گروپ فوٹوز بھی بنوائے گئے، اس موقع پرپنجاب کے تمام ڈویژنز کی ٹیمیں،ڈائریکٹر سپورٹس رانا ندیم انجم، ڈپٹی ڈائریکٹر چاند پروین، پنجاب وومن ہاکی ایسوسی ایشن کی صدر عابدہ تنویر، سیکرٹری راحت خان، انٹرنیشنل ہاکی امپائربینش حیات اور راشدمحمود بٹ ودیگر نے شرکت کی ۔

ڈی جی سپورٹس خضرافضال چودھری نے میڈیا سے گفتگو کرتے ہوئے کہا کہ انٹرڈویژن پنجاب وومن ہاکی ٹورنامنٹ کا انعقاد خوش آئند ہے ،ایونٹ میں شرکت کرنیوالی ٹیموں کو خوش آمدید کہتا ہوں، انٹرڈویژن پنجاب وومن ہاکی ٹورنامنٹ آئندہ ماہ ہونیوالی نیشنل یوتھ گیمز اور نیشنل گیمزکراچی کے لئے پنجاب کی ٹیم کا انتخاب کرنے میں کارآمد ثابت ہوگا، ٹورنامنٹ کے بعد پہلی نیشنل یوتھ گیمز کے ٹرائلز ہوں گے جس سے پنجاب کی ٹیم تیار کی جائے گی، ہاکی ہمارا قومی کھیل ہے اس کی ترقی کیلئے بھرپوراقدامات اٹھارہے ہیں۔

(جاری ہے)

انہوں نے کہا کہ انٹرڈویژن پنجاب وومن ہاکی ٹورنامنٹ سے نئی کھلاڑی سامنے آئیں گے جو مستقبل میں پنجاب اور قومی ٹیم کی نمائندگی کریں گی، ٹورنامنٹ کی میں نمایاں کاکردگی دکھانے والی کھلاڑیوں کو سپورٹس انڈوومنٹ فنڈ میں شامل کیا جائے گا۔افتتاحی تقریب کے موقع پر ڈی جی سپورٹس پنجاب خضرافضال چودھری کاکھلاڑیوں اور آفیشلز کے ساتھ تعارف کروایا گیا اور گروپ فوٹوز بھی بنوائے گئے۔

پنجاب وومن ہاکی ایسوسی ایشن کے زیر اہتمام اور سپورٹس بورڈ پنجاب کے تعاون سے ہونے والے انٹرڈویژن پنجاب وومن ہاکی ٹورنامنٹ کے افتتاحی روز ہونیوالے لیگ میچز میں فیصل آباد نے گوجرانوالہ کو باآسانی9-0، ملتان نے ڈی جی خان کو 2-0، سرگودھا نے راولپنڈی کو 1-0 جبکہ لاہور نے بہاولپور کو 2-0سے ہرادیا ۔