Live Updates

سعودی محکمہ شہری دفاع کا ہفتے تک بارش کا الرٹ جاری ، شہریوں کو احتیاط کرنے کی ہدایت

منگل 12 اگست 2025 11:33

ریاض (اُردو پوائنٹ اخبارتازہ ترین - اے پی پی۔ 12 اگست2025ء) سعودی عرب کے محکمہ شہری دفاع نے مملکت بھر میں ہفتے تک بارش کا الرٹ جاری کر دیا۔ ایس پی اے کے مطابق محکمہ شہری دفاع نے ایکس اکاونٹ پر بیان میں کہا ہے کہ درمیانے درجے سے شدید بارش سے متاثر ہونے والے علاقوں میں سیلاب، ژالہ باری اور گردآلود ہوائیں چلنے کا بھی امکان ہے۔

(جاری ہے)

مکہ مکرمہ ریجن میں مکہ شہر، طائف، میسان، اضم، العرضیات، الجموم، بحرہ، المویہ، الخرمہ، رنیہ، اللیث، القنفذہ اور الکامل ،جازان، عسیر اور الباحہ ریجن بارش سے متاثر ہوں گے۔

بیان میں شہریوں کو احتیاطی تدابیر پر عملدرآمد کرنے کے ساتھ ساتھ خود کو محفوظ مقامات تک محدود رکھنے کی ہدایت کی گئی ہے۔ بیان میں کہا گیا ہے کہ شہری سیلاب سے متاثرہ مقامات، وادیوں اور نشیبی مقامات سے دور رہیں۔ ایسے مقامات پر جہاں بارش کا پانی جمع ہو تیراکی سے گریز کیا جائے اور سرکاری چینلز اور سوشل میڈیا پلیٹ فارمز کے ذریعے اعلان کردہ شہری دفاع کی ہدایات پر عمل درآمد کیا جائے۔