سندھ حکومت محکمہ کھیل کی جانب سے یوم آزادی کے موقع پر "معرکہ حق" ایم ایم عالم سائیکل ریلی" کا انعقاد

بدھ 13 اگست 2025 15:21

کراچی(اُردو پوائنٹ اخبارتازہ ترین - این این آئی۔ 13 اگست2025ء)سندھ حکومت محکمہ کھیل کی جانب سے یوم آزادی کے موقع پر "معرکہ حق" ایم ایم عالم سائیکل ریلی" کا انعقاد کیا گیا، جس میں کران گروپ نے بھی تعاون فراہم کیا۔ ریلی پی آئی ڈی سی سے محکمہ اسپورٹس کے یوتھ ڈویلپمنٹ سینٹر سے شروع ہو کر صدر کے راستے مزار قائد پر اختتام پذیر ہوئی۔

(جاری ہے)

ترجمان محکمہ کھیل کے مطابق ریلی میں 200 سائیکلسٹس نے حصہ لیا، جن میں سیکریٹری اسپورٹس منور مہیسر، ایڈیشنل سیکریٹری اسد اسحاق، ڈی ایس او فرید علی، اسماعیل شاہ، حاجرا نواب، سنی پرویز، محمد عثمان اور اللہ ڈنو گوپانگ بھی شامل تھے۔

مزار قائد پر سیکریٹری اسپورٹس منور مہیسر اور شرکا نے جشنِ آزادی کا کیک کاٹا۔ اس موقع پر میڈیا سے گفتگو کرتے ہوئے منور مہیسر نے کہا کہ کراچی سے کشمور تک محکمہ کھیل کی جانب سے یوم آزادی کی تقریبات کا سلسلہ جاری ہے، اور 78واں یوم آزادی بھرپور جوش و جذبے سے منایا جا رہا ہے۔انہوں نے مزید بتایا کہ سائیکل ریلی میں شریک تمام شرکا کو کیش انعامات بھی دیے گئے۔