پاکستان کے 78ویں یومِ آزادی معرکہ حق پر سید ریاض حسین شاہ شیرازی کا قوم کے نام پیغام

آپریشن بنیان مرصوص کی وجہ سے اس بار عوام میں وطن سے محبت اور ترقی کے لیے نئے عزم کی فضا نمایاں ہے،صوبائی وزیراوقاف

جمعرات 14 اگست 2025 18:35

کراچی(اُردو پوائنٹ اخبارتازہ ترین - این این آئی۔ 14 اگست2025ء) پاکستان کے 78ویں یومِ آزادی معرکہ حق پر سید ریاض حسین شاہ شیرازی کا قوم کے نام پیغام۔ پاکستان کے 78ویں یومِ آزادی معرکہ حق کے موقع پر صوبائی وزیر برائے اوقاف، مذہبی امور، زکو و عشر، سید ریاض حسین شاہ شیرازی نے پوری قوم کو دلی مبارکباد پیش کرتے ہوئے اپنے جاری بیان میں کہا کہ آج کا دن قومی یکجہتی، حب الوطنی اور عزمِ نو کی علامت ہی. انہوں نے کہا معرکہ حق اور آپریشن بنیان مرصوص کی وجہ سے اس بار عوام میں وطن سے محبت اور ترقی کے لیے نئے عزم کی فضا نمایاں ہے۔

انہوں نے کہا کہ یومِ آزادی ہمیں اپنے اسلاف کی قربانیوں اور جدوجہد کی یاد دلاتا ہے جنہوں نے ایک آزاد اور خودمختار وطن کے خواب کو حقیقت بنایا۔ شہدا کی ان لازوال قربانیوں کو ہمیشہ یاد رکھا جائے گا۔

(جاری ہے)

سید ریاض حسین شاہ شیرازی نے اس عزم کا اظہار کیا کہ پاکستان کی ترقی، خوشحالی اور استحکام کے لیے ہم سب کو متحد ہو کر کام کرنا ہوگا۔ قومی اتحاد ہماری سب سے بڑی طاقت ہے، اور نوجوان نسل کو تعلیم، محنت اور دیانتداری کو اپنی زندگی کا شعار بنانا چاہیے۔

انہوں نے کہا کہ پاکستان کو دنیا کا ایک مضبوط، خوشحال اور پرامن ملک بنانا ہمارا قومی مقصد ہے۔ معرکہ حق کی کامیابی اس بات کا ثبوت ہے کہ اتحاد اور ایمان کے جذبے سے ہر رکاوٹ کو شکست دی جا سکتی ہے۔ صوبائی وزیر نے وطن کا دفاع کرنے والی پاک افواج کو سلام پیش کرتے ہوئے کہا کہ افواجِ پاکستان قوم کا فخر ہیں۔ انہوں نے مزید کہا آج کے دن ہم یہ عہد کرتے ہیں کہ پاکستان کو ایک مضبوط اور خودمختار ریاست بنانے کے لیے اپنی تمام صلاحیتیں بروئے کار لائیں گے۔ آخر میں انہوں نے دعا کی کہ اللہ تعالی پاکستان کی آزادی، سلامتی اور خودمختاری کو ہمیشہ قائم و دائم رکھے۔