آئندہ 3 روز میں پنجاب میں طوفانی بارشوں کی پیشگوئی ہے

لاہور (اُردو پوائنٹ اخبارتازہ ترین - آن لائن۔ 16 اگست2025ء) کے پی کے اور ملک کے بالائی علاقوں میں شدید طوفانی بارشوں اور کلاؤڈ برسٹنگ کے پیش نظر پی ڈی ایم اے پنجاب الرٹ ہے۔ ڈی جی پی ڈی ایم اے پنجاب عرفان علی کاٹھیا کی زیر صدارت ڈپٹی کمشنرز کا اجلاس ہوا۔ پوٹھوہار ریجن اور ڈیرہ غازی خان ڈویژن کے ڈی سیز نے اجلاس میں ویڈیو لنک کے ذریعے شرکت کی۔

راولپنڈی مری جہلم چکوال ڈیرہ غازی خان راجن پور رحیم یار خان لیہ کے ڈی سیز نے بھی اجلاس میں شرکت کی۔ ڈائریکٹر جنرل پی ڈی ایم اے عرفان علی کاٹھیا کا کہنا تھا کہ آئندہ 3 روز میں پنجاب میں طوفانی بارشوں کی پیشگوئی ہے۔ بالائی پنجاب میں شدید طوفانی بارشوں اور کلاؤڈ برسٹنگ کا خدشہ ہے۔ آئندہ 72 گھنٹوں میں ڈیرہ غازی خان کی رودکوہیوں میں بھی سیلابی ریلوں کا خدشہ ہے۔

(جاری ہے)

موسمی صورتحال کے پیش نظر تمام انتظامیہ ہائی الرٹ رہیں۔ وزیر اعلیٰ پنجاب کی ہدایات کے پیشِ نظر حساس مقامات پر ریسکیو ٹیموں کو تعینات کریں۔ ریسکیو سول ڈیفنس اور دیگر متعلقہ محکموں کو ہائی الرٹ پر رکھیں۔ ڈی جی پی ڈی ایم اے نے اضلاع کو تمام تر وسائل فراہم کرنے کی یقین دھانی کروائی۔ ڈی جی پی ڈی ایم اے کا مزید کہنا تھا کہ پی ڈی ایم اے پنجاب اضلاع کو تمام تر وسائل اور معاونت کو فوری یقینی بنائے گا۔

مون سون بارشوں کا ساتواں اسپیل زیادہ مضبوط ہے طوفانی بارشوں کی پیشگوئی ہے۔ دریاؤں ندی نالوں اور نشیبی علاقوں کی 24 گھنٹے مانیٹرنگ کو یقینی بنایا جائے۔ پی ڈی ایم اے پنجاب صوبائی ایمرجنسی کنٹرول روم ضلعی ایمرجنسی آپریشن سینٹرز سے 24 گھنٹے رابطے میں ہے۔ ریسکیو سول ڈیفنس محکمہ صحت اور دیگر متعلقہ محکموں کو بھی ہائی الرٹ رکھیں۔ ہنگامی صورتحال سے نمٹنے کیلئے ہسپتالوں میں عملے کی فراہمی کو یقینی بنایا جائے۔

موسلادھار بارش کی صورت میں شہریوں کو پیشگی آگاہ کریں۔ ڈی جی پی ڈی ایم اے نے ہنگامی صورتحال میں ہسپتالوں میں عملے کی موجودگی یقینی بنانے کی ہدایات بھی جاری کیں۔ تمام حساس مقامات بالخصوص ہسپتالوں کے اطراف نکاسی آب کو یقینی بنایا جائے۔ مساجد میں اعلانات اور لوکل سطح پر شہریوں کو محفوظ مقامات پر رہنے کی ہدایات جاری کی جائیں۔ شہریوں سے التماس ہے کہ ضلعی انتظامیہ اور ریسکیو اداروں سے مکمل تعاون کریں۔