ایچ ایم سی پشاورکی جانب سے بونیر کے سیلاب متاثرین کیلئے ہنگامی ریلیف ٹیم روانہ

پیر 18 اگست 2025 20:02

پشاور (اُردو پوائنٹ اخبارتازہ ترین - اے پی پی۔ 18 اگست2025ء) ایم ٹی آئی حیات آباد میڈیکل کمپلیکس (ایچ ایم سی) کی انتظامیہ کیجانب سے بونیر میں حالیہ سیلاب سے متاثرہ عوام کی فوری امداد کے لیے ایک خصوصی ریلیف ٹیم روانہ کر دی گئی ہے۔

(جاری ہے)

تر جمان کے مطابق میڈیکل ڈائریکٹر ڈاکٹر شاہ سوار ،ہسپتال ڈائریکٹر ڈاکٹر شیر زمان،ڈین خیبر گرلز میڈیکل کالج ڈاکٹر شہزاد اکبر،کلینیکل کوارڈینیٹر ڈاکٹر محمد شاہ اور انصاف ڈاکٹر فورم سے ڈاکٹر نظیف وزیر کی زیر نگرانی اس ٹیم میں ماہر ڈاکٹرز، نرسز، پیرامیڈیکس اور دیگر طبی عملہ کی ٹیم تشکیل دی گئی ہے، جو ضروری ادویات، اشیائے خورونوش، دو ایمبولینسز، ایک مرسڈیز پینتھر اور ڈرائیورز کے ہمراہ حیات آباد میڈیکل کمپلیکس سے بونیر کے متاثرہ علاقوں کی جانب روانہ ہوگئی۔

ہسپتال انتظامیہ کے مطابق دو ایمبولینسز اور مرسڈیز پینتھر متاثرہ علاقوں میں 24/7 ایمرجنسی ڈیوٹی پر موجود رہیں گے۔ علاوہ ازیں فوری طبی سہولیات، مریضوں کی بروقت نقل و حمل اور ادویات و خوراک کی فراہمی بھی یقینی بنائی گئی ہے۔یہ ٹیم متاثرہ عوام کے لیے فلاحی کیمپس قائم کرے گی، جہاں ادویات، خوراک، صاف پینے کا پانی اور بنیادی طبی سہولیات فراہم کی جائے گی۔