انسانیت تمام رشتوں سے بلند اور ہر سرحد سے بے نیاز ہے‘ مریم نواز شریف

غزہ کے معصوم شہدا اور کشمیری عوام کی آہیں دنیا کے ہر حساس دل کو جھنجھوڑ رہی ہیں‘وزیر اعلیٰ پنجاب

منگل 19 اگست 2025 16:18

انسانیت تمام رشتوں سے بلند اور ہر سرحد سے بے نیاز ہے‘ مریم نواز شریف

لاہور (اُردو پوائنٹ اخبارتازہ ترین - این این آئی۔ 19 اگست2025ء) وزیر اعلیٰ پنجاب مریم نواز شریف نے کہا ہے کہ انسانیت عظیم نسبت ہے جو تمام رشتوں سے بلند اور ہر سرحد سے بے نیاز ہے۔انسانی ہمدردی کے عالمی دن کے موقع پر وزیر اعلیٰ مریم نواز نے اپنے پیغام میں کہا کہ دوسروں کے لیے راحت، آسودگی اور آسانیوں کا وسیلہ بننا دراصل انسانیت کی خدمت ہے، خدمتِ انسانیت کا جذبہ رنگ، مذہب اور ہر تعصب سے بالاتر ہے۔

(جاری ہے)

انہوں نے کہا کہ موجودہ عالمی حالات کے تناظر میں انسانیت کی خدمت کا جذبہ پہلے سے کہیں زیادہ اہم ہے، غزہ کے معصوم شہدا اور کشمیری عوام کی آہیں دنیا کے ہر حساس دل کو جھنجھوڑ رہی ہیں۔مریم نواز شریف نے مزید کہا کہ انسان سے ہمدردی عبادت کے مترادف اور سب سے بڑی خدمت ہے، حکومتِ پنجاب کا ہر اقدام اور پراجیکٹ انسانی ہمدردی اور عوام کی خدمت کے لیے ہے، ہمیں ایسی دنیا بنانی ہے جہاں امن، محبت اور انسانیت پروان چڑھے۔