اسلام آباد ہائیکورٹ نے توہین مذہب کے مقدمے میں قید ملزم کی ضمانت منظور کرلی

ملزم واٹس ایپ گروپ میں ایڈ تھا جہاں سے ایسا مواد آتا ہے‘معلوم نہیں کرسکے کہ سم کس کے نام پر ہے .ایف آئی اے کا عدالت کے استفسار پر جواب

میاں محمد ندیم منگل 19 اگست 2025 14:52

اسلام آباد ہائیکورٹ نے توہین مذہب کے مقدمے میں قید ملزم کی ضمانت منظور ..

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔19 اگست ۔2025 )اسلام آباد ہائیکورٹ نے توہین مذہب کے مقدمے میں 21 ماہ سے قید ملزم عاصم اللہ کی ضمانت منظور کرلی ہے نجی ٹی وی کے مطابق اسلام آباد ہائی کورٹ کے جسٹس بابر ستار نے ملزم کی ضمانت منظور کرتے ہوئے رہائی کے احکامات جاری کیے، ملزم عاصم اللہ کی جانب سے وکیل آصف علی تمبولی عدالت میں پیش ہوئے. وکیل نے عدالت کے روبرو موقف اپنایا کہ 30 اکتوبر 2023 سے موکل گرفتار ہے، ابھی تک تفتیش مکمل نہیں ہو ئی جسٹس بابر ستار نے کہا کہ تقریباً 2 سال سے ایک شہری قید ہے، ابھی تک تفتیش مکمل کیوں نہیں ہوئی؟ .

(جاری ہے)

وفاقی تحقیقاتی ادارے (ایف آئی اے) کی جانب سے بتایا گیا کہ عاصم اللہ ایک واٹس ایپ گروپ میں ایڈ تھا جہاں سے ایسا مواد آتا ہے، ہم نے سِم کو ٹریس کر کے 2023 میں عاصم اللہ کو گرفتار کیا جسٹس بابر ستار نے استفسار کیا کہ استعمال کردہ سِم کس کے نام پر ہے؟ جس پر ایف آئی اے حکام نے حیرت انگیز جواب دیا کہ ہم یہ معلوم نہیں کرسکے کہ سم کس کے نام پر ہے عدالت نے ملزم کی ضمانت منظور کرتے ہوئے ملزم عاصم اللہ کو رہا کرنے کا حکم دے دیا.