ایڈم زمپا کو جنوبی افریقا کے خلاف نازیبا زبان کا استعمال مہنگا پڑگیا

جمعرات 21 اگست 2025 14:51

سڈنی (اُردو پوائنٹ اخبارتازہ ترین - این این آئی۔ 21 اگست2025ء)آسٹریلوی اسپنر ایڈم زمپا کو جنوبی افریقا کے خلاف پہلے ون ڈے میچ میں نازیبا زبان کا استعمال مہنگا پڑ گیا۔جنوبی افریقا کے خلاف پہلے ون ڈے میچ میں آسٹریلوی اسپنر ایڈم زمپا آئی سی سی کوڈ آف کنڈکٹ کی خلاف ورزی کے مرتکب قرار پائے ہیں۔آئی سی سی کے مطابق ایڈم زمپا نے جنوبی افریقا کے خلاف میچ میں لیول ون کی خلاف ورزی کی ہے۔

انٹرنیشنل کرکٹ کونسل کا کہنا ہے کہ زمپا نے بولنگ کے دوران نازیبا زبان استعمال کی جو اسٹمپ مائیک میں سنی گئی، انہیں کوڈ آف کنڈکٹ کی خلاف ورزی پر ایک ڈی میرٹ پوائنٹ دیا گیا ہے۔ایڈم زمپا نے اپنی غلطی کو تسلیم کرتے ہوئے سزا کو قبول کیا ہے۔واضح رہے کہ گزشتہ روز جنوبی افریقا نے پہلے ون ڈے میچ میں کیشو مہاراج کی کیریئر بیسٹ بولنگ کی بدولت آسٹریلیا کو 98 رنز سے شکست دی تھی۔

(جاری ہے)

جنوبی افریقہ نے ایڈن مارکرام 82، ٹمبا باووما 65 اور میتھیو بریٹزکے 57 کی نصف سنچریز کی بدولت مقررہ 50 اوورز میں آٹھ وکٹوں کے نقصان پر 296 رنز بنائے۔آسٹریلیا کی جانب سے ٹریوس ہیڈ نے چار، بین ڈوریشس نے دو اور ایڈم زیمپا نے ایک وکٹ حاصل کی۔ہدف کے تعاقب میں آسٹریلوی ٹیم نے جارحانہ آغاز کیا تاہم 60 رنز پر پہلی وکٹ گرنے کے بعد آسٹریلوی بلے باز کیشو مہاراج کی تباہ کن بولنگ کا سامنا نہ کرسکے۔جنوبی افریقہ کو تین ایک روزہ میچز کی سیریز میں 0-1 کی برتری حاصل ہوگئی۔