پی سی بی کا کلبز کی سکروٹنی کیلئے طریقہ کار تبدیل کرنے کا اعلان

ہفتہ 23 اگست 2025 22:47

لاہور (اُردو پوائنٹ اخبارتازہ ترین - این این آئی۔ 23 اگست2025ء)پاکستان کرکٹ بورڈ نے کلبز کی سکروٹنی کے لئے طریقہ کارمیں ردوبدل کرنے کا فیصلہ کر لیا۔ چیئرمین پی سی بی محسن نقوی کی زیر صدارت کی زیر صدارت پی سی بی کے بورڈ آف گورنرز کا 80واں اجلاس ہوا جس میں پاکستانی کرکٹ کا معیار بہتر بنانے کے لیے اقدامات پر غور کیا گیا۔پی سی بی کی جانب سے جاری کردہ اعلامیہ کے مطابق اجلاس میں انٹرنیشنل کرکٹ میں ٹیم کی کارکردگی بہتر بنانے کے حوالے سے تبادلہ خیال کیا گیا اور خواتین کرکٹ کے فروغ کیلئے گراس روٹ لیول پر اقدامات پر بریفنگ بھی دی گئی۔

اعلامیہ کے مطابق ڈومیسٹک کرکٹ اور نوجوان ٹیلنٹ آگے لانے کے حوالے سے بریفنگ دی گئی اور ہائی پرفارمنس سنٹرز کی اپ گریڈیشن پر بھی اجلاس کو بریف کیا گیا۔

(جاری ہے)

اجلاس میں پی سی بی کے اپ ڈیٹڈ فنانشل رولز اور آڈیٹرز کے ازسرنو تقرر کی منظوری دی گئی جبکہ گلوبل اینٹی کرپشن کوڈ اپنانے کے لئے طریقہ کار میں تبدیلی کو بھی منظور کرلیا گیا۔اجلاس میں کلبز کی سکروٹنی کے لئے طریقہ کار میں ردوبدل کرنے کا فیصلہ بھی کیا گیا جب کہ اجلاس میں بی او جی کے 78ویں اجلاس اور 79ویں اجلاس کے فیصلوں کی توثیق کی گئی ۔

بورڈ آف گورنرز کے ممبران انوار غنی، ظہیر عباس، سجاد علی کھوکھر، ظفر اللہ، تنویر احمد، محمد اسماعیل قریشی، طارق سرور ، چیف آپریٹنگ آفیسر پی سی بی سمیر احمد ، چیف ایگزیکٹو آفیسر پی ایس ایل سلمان نصیر،چیف فنانشل آفیسر ، انٹرنیشنل کرکٹ،میڈیا اینڈ کمیونیکیشن ، ڈومیسٹک کرکٹ،ہیومن ریسورس،ہائی پرفارمنس سنٹرز کے ڈائریکٹرز ، وویمنز کرکٹ کی سربراہ اور لیگل ڈیپارٹمنٹ کے حکام بھی اجلاس میں شریک ہوئے۔