صنعتی یونٹس لگانے کیلئے حاصل کئے گئے پلاٹوں پر کارخانے نہ لگے تو پلاٹ کینسل کر دیں گے

لاہور (اُردو پوائنٹ اخبارتازہ ترین۔ 21 اگست 2025ء) صوبائی وزیر صنعت و تجارت چوہدری شافع حسین کی زیر صدارت پیسک ہاؤس میں اہم اجلاس منعقد ہواجس میں فیصل آباد انڈسٹریل اسٹیٹ ڈویلپمنٹ اینڈ مینجمنٹ کمپنی کی مجموعی کارکردگی کا تفصیلی جائزہ لیا گیا۔ صوبائی وزیر نے گزشتہ ایک سال کے دوران فیڈمک کی سرمایہ کاری کے فروغ کیلئے اٹھائے گئے اقدامات پر اظہار اطمینان کیا۔

صوبائی سیکرٹری انڈسٹریز محمد عمر مسعود، چیئرمین فیڈمک رانا اظہر وقار،سی ای او میاں جمیل احمد،سینئر اکنامک ایڈوائزر جاوید اقبال اور دیگر متعلقہ افسران نے اجلاس میں شرکت کی۔ صوبائی وزیر صنعت و تجارت چوہدری شافع حسین نے اس موقع پر گفتگو کرتے ہوئے کہاکہ گزشتہ ایک سال کے دوران فیڈمک کے زیر اہتمام انڈسٹریل اسٹیٹس میں سرمایہ کاری لانے کیلئے مؤثر اقدامات کئے گئے۔

(جاری ہے)

باؤنڈری وال کی تعمیر،سکیورٹی کے مؤثر انتظامات اور صنعتی انفراسٹرکچر کی بہتری سے اربوں روپے کی نئی سرمایہ کاری آئی۔گزشتہ 6 ماہ میں علامہ اقبال انڈسٹریل سٹی میں 64 صنعتی پلاٹس فروخت ہوئے۔ چوہدری شافع حسین نے کہاکہ ان پلاٹوں پر صنعتی یونٹس لگنے سے 119526ملین روپے کی مقامی اور 7601ملین روپے کی غیر ملکی سرمایہ کاری ہوگی،یہاں نئے صنعتی یونٹس لگنے سے 6582 لوگوں کو روزگار ملے گا۔

ایم تھری انڈسٹریل سٹی میں گزشتہ 6 ماہ کے دوران 16 صنعتی پلاٹس فروخت ہوئے،ان پلاٹوں پر صنعتی یونٹس لگنے سے 4205ملین روپے کی مقامی اور 1598ملین روپے کی غیر ملکی سرمایہ کاری ہوگی،یہاں نئی صنعتیں لگنے سے 2ہزار لوگوں کو روزگار ملے گا۔ صوبائی وزیر صنعت و تجارت چوہدری شافع حسین نے کہاکہ صنعتی یونٹس لگانے کیلئے حاصل کئے گئے پلاٹوں پر پالیسی کے مطابق کارخانے نہ لگے تو پلاٹ کینسل ہوں گے۔

انڈسٹریل اسٹیٹس میں جاری ترقیاتی کاموں کے معیار پر کوئی سمجھوتا نہیں ہوگا۔ چوہدری شافع حسین نے کہاکہ فالو اپ کے ذریعے اہداف کا حصول یقینی بنایا جائے، انڈسٹریل اسٹیٹس میں آکسیجن کی فراہمی کا ذریعہ بننے والے درخت لگائے جائیں۔ وزیرصنعت و تجارت پنجاب نے کہاکہ فیڈمک کے زیر اہتمام انڈسٹریل اسٹیٹس میں ریلوے اسٹیشن اور کمیونٹی سینٹر بن رہا ہے،چنیوٹ -ساہیاں والا روڈ زیر تعمیر ہے۔

غیر ملکی سرمایہ کاروں کو بہترین سہولیات اور فول پروف سکیورٹی فراہم کی گئی ہے۔ سی ای او فیڈمک میاں جمیل احمد نے صوبائی وزیر کو انڈسٹریل اسٹیٹس میں جاری ترقیاتی کاموں اور دیگر امور بارے تفصیلی بریفنگ دیتے ہوئے کہاکہ فیڈمک کے زیر اہتمام انڈسٹریل اسٹیٹس میں 217صنعتی یونٹس پیدا وار دے رہے ہیں۔فیڈمک کے زیر اہتمام انڈسٹریل اسٹیٹس میں گزشتہ 7ماہ میں الاٹیز سے 2ہزار ملین روپے ریکور کئے گئے ہیں،الاٹیز سے 3ارب روپے کی ریکوری کے نوٹسز بھجوائے گئے ہیں۔