جعلی نکاح نامہ تیار کرنے کے مقدمے میں ملوث ملزم کی ضمانت منظور

عدالت نے ایک لاکھ روپے کے مچلکوں کے عوض رہا کرنے کا حکم جاری کر دیا

جمعہ 22 اگست 2025 20:25

لاہور(اُردو پوائنٹ اخبارتازہ ترین - این این آئی۔ 22 اگست2025ء) لاہور ہائیکورٹ نے جعلی نکاح نامہ تیار کرنے کے مقدمے میں ملوث ملزم کی ضمانت منظور کر تے ہوئے ایک لاکھ روپے کے مچلکوں کے عوض رہا کرنے کا حکم جاری کر دیا۔لاہور ہائیکورٹ میں ملزم سلمان بٹ کی درخواست پرسماعت ہوئی ۔ملزم کے وکیل نے موقف اپنایا گیاکہ سلمان بٹ نے نومبر 2024 میں اپنی کلاس فیلو سے شادی کی جس کے بعد اپریل 2025 میں لڑکی کے لواحقین نے جعلی نکاح نامہ تیار کرنے کا الزام عائد کرتے ہوئے مقدمہ درج کروا دیا۔

(جاری ہے)

عدالت نکاح خواں کی ضمانت منظور کر چکی ہے اس لیے استدعاہے ملزم کو بھی ضمانت پر رہا کرنے کا حکم دیا جائے ۔مخالف وکیل نے موقف اپنایا کہ ملزم نے جعلی نکاح نامہ بنوایا اور فرانزک رپورٹ کے مطابق انگوٹھوں کے نشانات ملزم سے مطابقت رکھتے ہیں، مدعی اور سرکاری وکیل نے عدالت سے ملزم کی ضمانت خارج کرنے کی استدعا کی۔فریقین کے دلائل سننے کے بعد عدالت نے ملزم سلمان بٹ کی درخواست ضمانت منظور کر تے ہوئے ایک لاکھ روپے کے مچلکوںکے عوض رہا کرنے کا حکم دیدیا ۔