سرگودھا،سی ای اوویسٹ مینجمنٹ نے ناقص کارکردگی پر یو سی ون کے سپروائزر تنویر بھٹی کو ملازمت سے برطرف کر دیا

ہفتہ 23 اگست 2025 17:54

سرگودھا(اُردو پوائنٹ اخبارتازہ ترین - این این آئی۔ 23 اگست2025ء)چیف ایگزیکٹو آفیسر ویسٹ مینجمنٹ نے ناقص کارکردگی پر یو سی ون کے سپروائزر تنویر بھٹی کو بھی فوری طور پر ملازمت سے برطرف کر دیا۔زرائع کے مطابق سی ای او رانا عمران شاہد نے یو سی 1کا اچانک دورہ کر کے صفائی کی صورتحال کا جائزہ لیا تو مکینوں نے شکایت کی کہ کئی روز سے گھروں سے کوڑا کرکٹ نہیں اٹھایا جا رہا اور علاقہ میں جگہ جگہ گندگی کے ڈھیر موجود اور صفائی انتہائی ناقص ہے،جس پر سی ای او رانا عمران شاہد نے موقع پر ہی ناقص کارکردگی کے ذمہ دار سپروائزر کو فوری طور پر ملازمت سے برطرف کرنے کے احکامات جاری کیے اور واضح کیا کہ شہریوں کو صاف اور صحت مند ماحول کی فراہمی ان کی اولین ترجیح ہے۔

انہوں نے خبردار کیا کہ یونین کونسلز کے اچانک دورے اب معمول کا حصہ ہوں گے، جہاں کوتاہی پائی گئی، وہاں کے سپروائزر اور ذمہ دار عملے کو فوری طور پر فارغ کر دیا جائے گا۔

(جاری ہے)

عملہ اپنا قبلہ درست کرے اور صفائی کے نظام کو اس معیار پر لائے جس پر عوام کا اعتماد بحال ہو۔ سی ای او نے ڈپٹی جنرل منیجرز اور متعلقہ افسران کو ہدایت کی کہ کچرا کنٹینرز کی بروقت صفائی، اسٹریٹ سویپنگ اور ڈور ٹو ڈور کلیکشن کے نظام کو مزید مثر بنایا جائے تاکہ شہریوں کو حقیقی معنوں میں ریلیف مل سکے۔ انہوں نے کہا کہ سستی یا غفلت کرنے والے افسران اور اہلکاروں کے لیے ایس ڈبلیو ایم سی میں کوئی جگہ نہیں ہے۔