آئینی بینچ میں 8 ستمبر سے اہم کیسزکی دوبارہ سماعت، روسٹر جاری

نئے ججوں کی تقرری سے صورتحال میں تبدیلی، بیشتر آئینی بینچوں میں شامل ہیں،نجی ٹی وی

جمعہ 29 اگست 2025 12:20

اسلام آباد(اُردو پوائنٹ اخبارتازہ ترین - این این آئی۔ 29 اگست2025ء)سپریم کورٹ کا آئینی بینچ دوماہ سے زائد وقفہ کے بعد8 ستمبر سے دوبارہ کام شروع کرے گا،27 جون کو آخری سماعت میں آئینی بینچ نے سپریم کورٹ کا وہ فیصلہ منسوخ کیا، جس میں مخصوص نشستوں پر پی ٹی آئی کا حق تسلیم کیا گیا تھا۔نجی ٹی وی کے مطابق ادھر نئے عدالتی سال کے آغاز پر سپریم کورٹ کا فل کورٹ اجلاس بلانے پر غور جس میں ججز، بار ممبران ،سائلین اور عوام کی تجویز کا جائزہ لیا جائے گا ، سپریم کورٹ رولز 2025 سے متعلق مزید تجاویز کیلیے پبلک نوٹس جاری ، جس کے مطابق ججز کمیٹی میں پیش تجاویز فل کورٹ کے سامنے پیش کی جائیں گی۔

سپریم کورٹ نے جسٹس امین الدین خان کے سربراہی میں پانچ رکنی آئینی بینچ کا روسٹر جاری کردیا، آئینی بینچ 8 سی12ستمبر تک آئین وقانون کی تشریح سے متعلق امورکی سماعت کرے گا، سپر ٹیکس کی دوبارہ سماعت بھی متوقع ہے۔

(جاری ہے)

گزشتہ سال نومبر سے آئینی بینچ 26 ویں آئینی ترمیم پر فیصلہ نہ کر سکا، جنوری میں سماعت تین ہفتے کیلئے موخر، بعدازاں سماعت ہی نہ کی۔

آئینی بینچ کی تشکیل کوبھی چیلنج کا سامنا ہے، سوال اٹھائے جا رہے کہ 26 ویں ترمیم سے مستفید ہونیوالے اس کے مستقبل کا فیصلہ کیسے کر سکتے ہیں۔فروری میں 8 نئے ججوں کی تقرری سے سپریم کورٹ کی صورتحال بھی بدل چکی ہے، ان میں بیشتر آئینی بینچوں میں شامل ہیں۔10 ماہ بعد بھی آئینی بینچ اپنے قواعدوضوابط تشکیل دینے میں ناکام ہے، اس کی نشاندہی جسٹس جمال مندوخیل کر چکے، آئینی بینچ نے صرف 3 فیصلے کئے۔ ان میں مخصوص نشستوں پر پی ٹی آئی کے حق تسلیم کرنیکے فیصلہ کی منسوخی، پی ٹی آئی کارکنوں کیخلاف کیسز کی فوجی عدالتوں میں سماعت کی توثیق اوردیگر ہائیکورٹس کے ججز کی اسلام آباد ہائیکورٹ ٹرانسفردرست قرار دینا شامل ہیں۔ تینوں اہم کیسز کا تفصیلی فیصلہ جاری نہیں ہوا۔