پاک چین دوستی ہر آزمائش پر پوری اتری، چینی طریقےقدرتی آفات سے نمٹنے میں سود مند ثابت ہوں گے، وزیراعظم

ہم تاریخی و ثقافتی اعتبار سے ایک دوسرے سے جڑے ہیں، قدرتی آفات سے نمٹنے کیلئے پاکستان اور چین کے جوائنٹ لیب جیسے منصوبے مزید فعال بنائے جائیں؛ تیانجن یونیورسٹی کے دورے کے موقع پر خطاب

ساجد علی اتوار 31 اگست 2025 15:17

پاک چین دوستی ہر آزمائش پر پوری اتری، چینی طریقےقدرتی آفات سے نمٹنے ..

تیانجن ( اُردو پوائنٹ اخبارتازہ ترین۔ 31 اگست 2025ء ) وزیراعظم شہباز شریف کا کہنا ہے کہ پاک چین دوستی ہر آزمائش پر پوری اتری، چین کی ٹیکنالوجی اور طریقے آفات سے نمٹنے میں سود مند ثابت ہوں گے۔ تیانجن یونیورسٹی کی فیکلٹی اور طلباء سے خطاب کرتے ہوئے انہوں نے کہا کہ 200 سے زائد پاکستانی طلبہ تیانجن یونیورسٹی میں زیر تعلیم ہیں، کل 30 ہزار کے قریب پاکستانی طلباء چین کے مختلف تعلیمی اداروں میں زیر تعلیم ہیں، چین میں زیر تعلیم پاکستانی طلباء ملک کے سفیر ہیں، یہ طلباء جدید تحقیق و عصری تعلیم اور فنی مہارتوں سے استفادہ کر رہے ہیں، ووکیشنل ٹریننگ وقت کا تقاضہ ہے اور 600 پاکستانی زرعی گریجویٹ نے بھی چین میں اپنی تربیت مکمل کرلی۔

شہباز شریف نے کہا کہ پاک چین دوستی باہمی اعتماد، احترام اور پرخلوص محبت کی بنیاد پر قائم ہے، یہ دوستی ہر آزمائش پر پوری اتری ہے، پاکستان اور چین تاریخی اور ثقافتی اعتبار سے ایک دوسرے سے جڑے ہیں، پاکستان مسلم دنیا کا پہلا ملک تھا جس نے عوامی جمہوریہ چین کو تسلیم کیا، چین آج دنیا کی ایک بڑی معاشی و فوجی طاقت ہے، چین نے جس طرح اپنے لوگوں کو غربت سے نکالا وہ دنیا کیلئے ایک مثال ہے، صدر شی جن پنگ کے مشترکہ خوشحالی کے وژن نے دنیا کو اپنا گرویدہ کرلیا۔

(جاری ہے)

بتایا گیا ہے کہ وزیراعظم شہباز شریف نے تیانجن یونیورسٹی میں نیشنل ارتھ کوئیک سمولیشن سینٹر کا دورہ بھی کیا جہاں انہوں نے چین کے قدرتی آفات سے نمٹنے کیلئے جدید ٹیکنالوجی کے استعمال کی تعریف کی اور کہا کہ جدید ٹیکنالوجی و طریقے پاکستان میں قدرتی آفات سے نمٹنے کیلئے انتہائی سود مند ثابت ہوں گے، چینی مہارت سے قدرتی آفات سے نمٹنے کیلئے مؤثر احتیاطی تدابیر، لائحہ عمل استعمال کیے جا سکیں گے، قدرتی آفات سے نمٹنے کیلئے پاکستان اور چین کے جوائنٹ لیب جیسے منصوبے مزید فعال بنائے جائیں، قدرتی آفات سے نمٹنے کیلئے چین اور پاکستان کے درمیان شراکت داری کو مزید توسیع دی جائے۔