امریکا نے فلسطینی شہریوں پرعائد ویزا پابندیوں کو مزید سخت کردیا

پیر 1 ستمبر 2025 14:42

واشنگٹن(اُردو پوائنٹ اخبارتازہ ترین - این این آئی۔ 01 ستمبر2025ء)امریکی صدر ڈونلڈ ٹرمپ کی انتظامیہ نے فلسطینی پاسپورٹ ہولڈرز پر ویزہ پابندیوں کو مزید سخت کرتے ہوئے تقریبا تمام اقسام کے نان امیگرنٹ وزیٹر ویزوں کا اجرا روک دیاہے۔ اس توسیع شدہ پابندی میں علاج معالجہ، یونیورسٹی کی تعلیم، کاروباری سفر اور رشتہ داروں یا دوستوں سے ملاقات کے لیے درخواستوں کو شامل کر لیا گیا ہے۔

(جاری ہے)

یہ اقدام 18 اگست کو سٹیٹ ڈیپارٹمنٹ کی جانب سے امریکی سفارتخانوں اور قونصل خانوں کو بھیجے گئے ایک پیغام میں بیان کیا گیا، جو اس سے قبل صرف غزہ کے رہائشیوں پر لاگو تھا،نئی پالیسی اب مغربی کنارے اور دنیا بھر میں مقیم فلسطینیوں کو بھی نشانہ بناتی ہے۔ٹرمپ انتظامیہ نیاگست میں فلسطین لبریشن آرگنائزیشن اور فلسطینی اتھارٹی کے ارکان کے ویزے بھی منسوخ کر دیے تھے تاکہ وہ نیویارک میں ہونے والے اقوام متحدہ کی جنرل اسمبلی کے اجلاس میں شرکت نہ کر سکیں۔امریکی محکمہ خارجہ نے کہا کہ یہ فیصلہ قومی سلامتی کے خدشات کی بنیاد پر کیا گیا ہے اور فلسطینی رہنمائوں پر الزام لگایا کہ وہ دہشت گردی سے دستبرداری اختیار کرنے میں ناکام رہے ہیں۔