کاشتکاروں کوکپاس کولیف کرل وائرس سے بچانے کیلئے ایک ایکڑ میں 80سے90کارڈ لگانے کی ہدایت

منگل 2 ستمبر 2025 12:50

فیصل آباد (اُردو پوائنٹ اخبارتازہ ترین - اے پی پی۔ 02 ستمبر2025ء) کپاس کے کاشتکاروں کوفصل کو لیف کرل وائرس اور سفید مکھی کے حملہ سے بچانے کیلئے ایک ایکڑ میں 80 سے 90 کارڈ لگانے کی ہدایت کی گئی ہے اور کہاگیاہے کہ ایک کارڈ پر 20سے25انڈے ہونا بھی ضروری ہیں۔ڈویژنل ڈائریکٹر محکمہ زراعت توسیع فیصل آباد چوہدری خالد محمودنے کہا کہ کپاس کے کاشتکار کھیتوں سے جڑی بوٹیوں کی تلفی فوری طور پر یقینی بنائیں۔

انہوں نے کہاکہ پتہ مروڑ وائرس سے بچاؤ اور سفید مکھی پر مؤثر کنٹرول کیلئے سورج نکلنے سے قبل یا زیادہ سے زیادہ سورج نکلنے کے ایک گھنٹہ بعد تک سپرے کیاجاسکتاہے۔انہوں نے بتایاکہ محکمہ زراعت کی فیصل آباد، ٹوبہ ٹیک سنگھ، جھنگ، اوکاڑہ، پاکپتن، ساہیوال،وہاڑی،لیہ، حافظ آباد، شیخوپورہ، مظفر گڑھ میں قائم حیاتیاتی کنٹرول لیبارٹریز نے کرائی سوپر لا کی افزائش کاعمل تیز کردیا ہے جبکہ کاشتکاروں کو پتہ مروڑ وائرس کے انسداد کیلئے کیڑے مار زہروں کے علاوہ حیاتیاتی انسداد کی بھی ہدایت کی گئی ہے۔

(جاری ہے)

انہوں نے کہاکہ کپاس کا پتہ مروڑ وائرس سفید مکھی کے ذریعے پھیلتاہے جبکہ کرائی سوپر لا ایک انتہائی مفید کیڑاہے جو سفید مکھی کے بچوں کو کھا کر اس کی بڑھتی ہوئی تعداد کو روکنے کا پیش خیمہ ثابت ہو رہا ہے ۔ انہوں نے کہاکہ کاشتکار مزید رہنمائی کیلئے محکمہ زراعت کے فیلڈ سٹاف سے بھی رابطہ کرسکتے ہیں۔