Live Updates

’’عشرہ رحمة للعالمین ؐ ‘‘ کے سلسلے میں محکمہ اوقاف کے زیر انتظام کتب نمائش کاآغاز

منگل 2 ستمبر 2025 16:43

لاہور(اُردو پوائنٹ اخبارتازہ ترین - این این آئی۔ 02 ستمبر2025ء)سیکرٹری /چیف ایڈ منسٹریٹراوقاف پنجاب ڈاکٹر طاہررضابخاری نے ’’عشرہ رحمة للعالمین ؐ ‘‘ کے سلسلے میں الحمراء آرٹ گیلری،دی مال لاہور میں ’’سہ روزہ نمائش کتب سیرت طیبہ ؐ ‘‘کا افتتاح کرتے ہوئے کہا کہ اٴْسوہء رسولؐ کا پیغام یہ ہے کہ سیلاب زدگان کی کھٴْلے دل سے مدد کی جائے۔ ’’عشرہ رحمة للعالمین ؐ ‘‘منانے کا تقاضہ ہے کہ مصیبت میں گرے لوگوں کو ریلیف میسر آئے۔

سیلاب زدگان کی پریشانی کم کرنا،قوم کا فرض اور سیرت نبوی ؐ کا درس ہے۔آپ ؐ نے ہر دور کے پریشان حال انسانوں کا سہارا بننے کی تلقین فرمائی۔سیلاب ایک آزمائش ہے،نبیؐ کی سنت ہے کہ آزمائش کا مقابلہ ہمت سے کریں۔نبی اکرم ؐ نے خدمتِ خلق کو ایمان کا حصہ قرار دیا۔

(جاری ہے)

انہوں نے کہا کہ سیرت طیبہؐ سے آگاہی کے لیے مطالعہ کتب سیرت کامطالعہ بنیادی حیثیت کا حامل ہے۔

سیرت نگاری اٴْمّتِ مسلمہ کے امتیازات و اعزازات میں سے اہم ترین شعبہ ہے۔ سیکرٹری اوقاف نے مزید کہا کہ یہاں پر قارئین کے لیے سیرت طیبہ ، اسلامیات، پاکستانیات اور اقبالیات پر مشتمل کتاب کا وسیع ذخیرہ ایک جگہ پر دستیاب کردیا گیا ہے۔ سہ روزہ نمائش کتب کا انعقاد محکمہ اوقاف و مذہبی امور پنجاب کے لیے ایک اعزاز ہے۔عصر حاضر میں کتب بینی بالخصوس دینی لٹریچر کے مطالعہ میں کمی واقع ہو رہی ہے، یہ نمائش کتب یقینا اس مطالعہ میں ا ضافہ کا باعث ہوگی۔

اس موقع پرڈائریکٹر جنرل مذہبی امور خالد محمودسندھو،ڈائریکٹر ایڈ منسٹریشن اوقاف محمد شاکر،ڈپٹی ڈائریکٹر زاوقاف آصف اعجاز،ایاز حبیب، زونل ایڈ منسٹریٹر اوقاف داتا دربار شیخ جمیل احمد،صوبائی خطیب اوقاف مولانا محمد احمد، لا ئبریرین مرکزی لائبریری اوقاف حافظ احمد مجتبیٰ،ایڈ من آفیسر علماء اکیڈمی رمضان بلوچ، اوقاف علماء مولانا محمد شفیق، مولانا مفتی عمران حنفی،علامہ سجادحسین جوادی سمیت پبلشرزو مکتبہ جات کے نمائندگان بھی موجود تھے۔