کچے کے عوام فوری طور پر اپنے رشتہ داروں کے پاس یا حکومت سندھ کے قائم کردہ رلیف کیمپس میں منتقل ہو جائیں، شرجیل انعام میمن

منگل 2 ستمبر 2025 18:02

نوابشاہ (اُردو پوائنٹ اخبارتازہ ترین - اے پی پی۔ 02 ستمبر2025ء) سندھ کے سینئر وزیر اور صوبائی وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کچے کے عوام سے اپیل کی ہے کہ وہ فوری طور پر اپنے رشتہ داروں کے پاس یا حکومت سندھ کے قائم کردہ رلیف کیمپس میں منتقل ہو جائیں۔ انہوں نے کہا کہ ملک بھر میں سیلاب نے گلگت بلتستان، خیبرپختونخوا اور پنجاب سمیت مختلف علاقوں میں شدید تباہ کاریاں مچائی ہیں، اور اب یہ ریلا صوبہ سندھ میں داخل ہونے والا ہے۔

ایک وڈیو بیان میں شرجیل انعام میمن کا کہنا تھا کہ حکومت سندھ نے صورت حال سے نمٹنے کے لئے مکمل اقدامات کر رکھے ہیں اور وزیراعلیٰ سندھ کی خصوصی ہدایات پر تمام وزراء اور متعلقہ ادارے متحرک ہیں۔ انہوں نے کہا کہ کچے کے عوام کے پاس بہت کم وقت رہ گیا ہے، اس لیے بروقت محفوظ مقامات پر منتقل ہونا ضروری ہے تاکہ کسی بڑے نقصان سے بچا جا سکے۔

(جاری ہے)

انہوں نے واضح کیا کہ انتظامیہ آن گراؤنڈ موجود اور متحرک ہے اور عوام کی ہر ممکن مدد کے لئے تیار ہے۔

اگر لوگ اپنے رشتہ داروں یا رلیف کیمپس میں منتقل ہونا چاہیں تو وہ بروقت اور باحفاظت جا سکتے ہیں۔ ان کا کہنا تھا کہ اگر پانی پہنچ گیا تو عوام کو کشتیوں میں نکالنا پڑ سکتا ہے، جو کہ ایک بڑا چیلنج ہوگا اور اس دوران حادثات کا خدشہ بھی رہتا ہے۔سینئر وزیر شرجیل انعام میمن نے کہا کہ حکومت سندھ عوام سے اپیل کرتی ہے کہ وہ ازخود محفوظ مقامات پر منتقل ہو جائیں تاکہ انسانی جانوں کا کوئی نقصان نہ ہو۔ انہوں نے کہا کہ ایک ایک جان ہمارے لئے قیمتی ہے، اس لئے عوام انتظامیہ، کمشنرز اور ڈپٹی کمشنرز کے ساتھ بھرپور تعاون کریں۔\378