برطانیہ کی ملکہ کمیلا کو سترہ سال کی عمر میں ٹرین میں سفر کے دوران جنسی طور پر ہراساں کیا گیا ، صحافی کا انکشاف

منگل 2 ستمبر 2025 22:00

:لندن (اُردو پوائنٹ اخبارتازہ ترین - آن لائن۔ 02 ستمبر2025ء)برطانیہ کی ملکہ کمیلا کو نوجوانی میں ایک ٹرین کے سفر کے دوران جنسی طور پر ہراساں کیے جانے کا انکشاف ہوا ہے۔یہ انکشاف معروف صحافی ویلنٹائن لو کی آنے والی کتاب ’پاور اینڈ دی پیلس: دی اِن سائیڈ اسٹوری آف دی مونارکی اینڈ 10 ڈاؤننگ اسٹریٹ میں کیا گیا ہے۔ یہ کتاب 11 ستمبر 2025ء کو شائع ہوگی۔

کتاب میں دعویٰ کیا گیا کہ کمیلا جو اُس وقت 16 یا 17 برس کی تھیں، پیڈنگٹن جانے والی ٹرین میں سفر کر رہی تھیں جب ایک شخص نے انہیں ہراساں کرنا شروع کیا، کمیلا نے اپنی والدہ کی نصیحت یاد رکھی اور حاضر دماغی کا مظاہرہ کرتے ہوئے جوتا اتار کر اس شخص کو دے مارا، اسٹیشن پہنچتے ہی انہوں نے اہلکار کو شکایت درج کروائی اور حملہ آور کو گرفتار کر لیا گیا۔

(جاری ہے)

کتاب میں بتایا گیا کہ یہ واقعہ ماضی میں اُس وقت منظر عام پر آیا جب کمیلا ڈچس آف کارن وال تھیں۔ انہوں نے لندن کے سابق میئر بورس جانسن کے ساتھ ملاقات کے دوران اپنی ذاتی کہانی بیان کی۔ یہ ملاقات جانسن کے لندن میں ریپ کرائسس سینٹرز کے قیام پر دورے کے دوران ہوئی تھی، کمیلا نے بعد ازاں ایسے مراکز کے قیام میں بھی اہم کردار ادا کیا۔ملکہ کمیلا نے ہمیشہ خواتین پر تشدد اور جنسی زیادتی کے متاثرین کے حق میں آواز بلند کی ہے، وہ گھریلو تشدد اور زیادتی کے شکار افراد کے لیے کئی منصوبوں کی سرپرستی کر رہی ہیں۔