سی سی ڈی پولیس ،ملزمان کے درمیان فائرنگ کے تبادلے میں 3ملزمان ہلاک ،1 زخمی

سبحان نامی ملزم کو نشاندہی کیلئے کرول پنڈ لے جایا جارہا تھا ،ساتھیوں کی فائرنگ سے مارا گیا رائے ونڈ میں سی سی ڈی سے مبینہ مقابلے میں ملزم ہلاک ،ریکوری کیلئے لیجاتے ہوئے ساتھیوں کی فائرنگ سے مارا گیا تھانہ مستی گیٹ کے قریب اشتہاری کیلئے ناکہ بندی کی گئی، فائرنگ کے تبادلے میں ایک ملزم مارا گیا ، ایک زخمی ہو گیا

بدھ 3 ستمبر 2025 14:35

لاہور/رائے ونڈ(اُردو پوائنٹ اخبارتازہ ترین - این این آئی۔ 03 ستمبر2025ء)مختلف مقامات پر سی سی ڈی پولیس اور ملزمان کے درمیان فائرنگ کے تبادلے میں 3ملزمان ہلاک جبکہ 1 زخمی ہوگیا۔پولیس ترجمان کے مطابق سبحان نامی ملزم کو نشاندہی کیلئے کرول پنڈ لے جایا جارہا تھا کہ ملزم کو چھڑانے کے لئے اس کے ساتھیوں نے حملہ کردیا، جوابی کارروائی میں ملزم اپنے ہی ساتھیوں کی فائرنگ سے مارا گیا، لاش کو پوسٹمارٹم کیلئے بھجوا دیا گیا۔

ترجمان پولیس نے بتایا کہ تھانہ مستی گیٹ کے قریب اہلکاروں نے اشتہاری کے لئے ناکہ بندی کی ہوئی تھی، 3 موٹر سائیکل سواروں کو روکنے کی کوشش کی تو انہوں نے پولیس اہلکاروں پر فائرنگ کر دی، فائرنگ رکنے پر 2 ملزمان زخمی ہو گئے، ایک ڈاکو زخموں کی تاب نہ لاتے ہوئے ہسپتال میں دم توڑ گیا۔

(جاری ہے)

پولیس حکام نے بتایا کہ ہلاک ملزم کی شناخت شبیر جبکہ زخمی کی آفاق کے نام سے ہوئی، ملزموں کے خلاف مزید تحقیقات شروع کردی گئی۔

رائے ونڈ میں سی سی ڈی سے مبینہ مقابلے میں ایک ملزم ہلاک ہو گیا ۔ بتایا گیا ہے کہ ملزم عامر کو ریکوری کے لئے لے جایا جارہا تھا کہ اسی دوران ملزم کے ساتھیوں نے اسے چھڑانے کے لئے فائرنگ کر دی۔ساتھیوں کی فائرنگ سے ملزم ہلاک ہو گیا۔پولیس نے لاش کو پوسٹمارٹم کے لئے مردہ خانے منتقل کر دیا جبکہ فرار ہونے والے ملزمان کی تلاش شروع کر دی گئی ۔