Live Updates

غیر معمولی سیلابی صورتحال نے زرعی معیشت کو ناقابلِ تلافی نقصان پہنچایا،سیکرٹری زراعت پنجاب

اتوار 7 ستمبر 2025 19:20

ملتان (اُردو پوائنٹ اخبارتازہ ترین - اے پی پی۔ 07 ستمبر2025ء) سیکرٹری زراعت پنجاب افتخار علی سہو نے کہا ہے کہ غیر معمولی سیلابی صورتحال نے زرعی معیشت کو ناقابلِ تلافی نقصان پہنچایا ہے۔ان خیالات کا اظہار انہوں نے ملتان میں قائم فلڈ ریلیف کیمپس کے دورہ کے دوران کیا۔ اس موقع پرسپشل سیکرٹری زراعت جنوبی پنجاب سرفراز خان مگسی،ڈائریکٹر جنرل انفارمیشن محکمہ زراعت پنجاب نوید عصمت کاہلوں،ڈائریکٹر زراعت توسیع ملتان شہزاد صابر اور لائیو سٹاک کے ڈاکٹر اعجاز گورسی بھی ان کے ہمراہ تھے۔

اپنے دورہ کے دوران سیکرٹری زراعت متاثرین سیلاب سے ملے اور ان کو عید میلاد النبی ﷺ کی مبارکباد پیش کی۔ اس موقع پر انہوں نے متاثرین سیلاب سے کھانے، رہائش اور طبی سہولتوں کے بارے میں بھی دریافت کیا۔

(جاری ہے)

افتخار علی سہو نے کہا کہ فصلوں کے نقصان کا تخمینہ لگانے کے لیے کمیٹیاں تشکیل دی جارہی ہیں۔انہوں نے کہا کہ محکمہ زراعت پنجاب کے تحت 12 سو فیلڈ عملہ فلڈ ڈیوٹی پر مامور ہے۔

اب تک 650 ٹرالیوں پر سبز چارہ متاثرین سیلاب کے جانوروں کے لیے فراہم کیا جا چکا ہے جبکہ 1300 ریڑھوں اور لوڈر رکشوں پر بھی سبز چارہ تقسیم کیا گیا۔مزید براں، محکمہ زراعت کے تحت 7 ہزار من سے زائد توڑی سیلاب متاثرین کے جانوروں کے لیے فراہم کی گئی ہے۔ اسی طرح 2 ہزار گانٹھ سائیلج بھی متعلقہ منتظمین کے حوالے کی گئی ہیں۔سیکرٹری زراعت نے مزید کہا کہ محکمہ زراعت کے سرکاری فارمز پر 300 ایکڑ رقبہ پر کاشتہ چارہ بھی سیلاب متاثرین کے جانوروں کے لیے وقف کر دیا گیا ہے۔ اس کے ساتھ ساتھ محکمہ زراعت کے 14 بلڈوزر بھی حفاظتی بند مضبوط کرنے کے لیے ضلعی انتظامیہ کو فراہم کیے گئے ہیں۔