وزیر اعلیٰ خیبر پختونخوا علی امین خان گنڈاپور نے سرکاری ملازمین کے لیے احساس ای۔پنشن سسٹم کے اجراءکی منظوری دیدی

پشاور (اُردو پوائنٹ اخبارتازہ ترین - اے پی پی۔ 08 ستمبر2025ء) خیبرپختونخوا حکومت کا ڈیجیٹل گورننس کی جانب ایک اور انقلابی اقدام، وزیر اعلیٰ خیبر پختونخوا علی امین خان گنڈاپور نے سرکاری ملازمین کے لیے احساس ای۔پنشن سسٹم کے اجراءکی منظوری دیدی ہے۔ ای۔ پنشن سسٹم یکم جنوری 2026 سے نافذ العمل ہوگا۔ وزیراعلیٰ سیکرٹریٹ نے ای۔پنشن سسٹم کے اجراءکے لئے کانسپٹ پیپر تیار کر لیا ہے جبکہ کانسپٹ پیپر کو عملی شکل دینے کے لئے محکمہ خزانہ کو احکامات جاری کر دیئے گئے ہیں۔

جنوری 2026 سے نئے پنشنرز کو پنشن کی ادائیگی ای-پنشن سسٹم کے تحت کی جائے گی جبکہ موجودہ پیپر بیسڈ پنشن نظام کو مکمل پیپر لیس ای- پنشن نظام میں تبدیل کر دیا جائے گا۔ اس مقصد کے لیے احساس پنشن ڈیش بورڈ کا اجراءکیا جائے گا جو بیسڈ پلیٹ فارم ہو گا اورمکمل طور پر پیپر لیس ورک فلو پر مشتمل ہو گا۔

(جاری ہے)

ملازمین ریٹائرمنٹ سے چھ ماہ قبل پورٹل پر ایک سادہ ڈیجیٹل فارم پرُ کر کے پنشن کیس داخل کرا سکیں گے،تمام ضروری دستاویزات بھی محفوظ طریقہ سے سکین کرکے براہ راست پورٹل پر اپ لوڈ کی جا سکیں گی۔

اسی طرح ، اگلے مرحلے میں سسٹم خودکار طریقہ سے متعلقہ حکام کے لیے ٹائم بائونڈ ٹاسکس تخلیق کرے گا، نئے نظام کے تحت کسی بھی مرحلے میں ایک بھی فزیکل فائل یا پیپر استعمال نہیں ہو گا۔  ویری فکیشن اور منظوری کا تمام عمل بھی ڈیجیٹل سسٹم کے ذریعہ مکمل کیا جائے گا۔ سسٹم خودکار طریقے سے سینکشن آرڈر، ریٹائرمنٹ آرڈر، پنشن پیپرز اور پنشن پیمنٹ آرڈر تیار کرے گا۔

یہ تمام آرڈرز ڈیجیٹل دستخط شدہ ہوں گے جو قانونی طور پر قابل قبول ہوں گے۔ ای پنشن سسٹم کے تحت محکمہ وار کارکردگی کی مانیٹرنگ کا ایک مربوط اور موثر نظام ہوگا۔وزیر اعلیٰ، چیف سیکرٹری اور سیکرٹری خزانہ ڈیش بورڈ کے ذریعہ کارکردگی کو مانیٹر کریں گے۔ یہ پیپر لیس نظام نادرا، اے جی آفس اور بینکس کے ساتھ منسلک ہو گا۔ مقررہ ٹائم لائن کے اندر پنشن ریٹائرڈ ملازم کے بنک اکائونٹ میں منتقل کر دی جائے گی۔

مزید برآں ، ای۔پنشن نظام کو دیرپا بنانے کے لیے متعلقہ قوانین میں ضروری ترامیم تجویز کی گئی ہیں۔ای۔ پنشن سسٹم کا بروقت اجراءیقینی بنانے کے لیے دس اہداف پر مشتمل روڈ میپ تیار کیا گیا ہے۔ روڈ میپ میں متعلقہ محکموں کو واضح اہداف بمعہ ٹائم لائنز  تفویض کیے گئے ہیں۔ 15 جنوری 2026 تک ای۔ پنشن سسٹم کا باضابطہ افتتاح کرنے کا ہدف مقرر کیا گیا ہے۔

نئے سسٹم کے اجراءسے پنشن پراسیس ٹائم مہینوں سے کم ہو کر دو سے چار ہفتوں تک آ جائے گا۔اس آن لائن نظام سے پینشنرز کو پنشن کے لیے دفاتر کے چکر نہیں لگانا پڑیں گے۔ وزیر اعلیٰ نے اس سلسلے میں جاری اپنے بیان میں کہا کہ ملازمین کو پنشن کے موجودہ نظام کی طرح مشکلات اور پریشانیوں کا سامنا نہیں کرنا پڑے گا،یہ ایک حقیقی پیپر لیس سسٹم ہو گا جس سے شفافیت اور جوابدہی کو فروغ ملے گا۔ خیبر پختونخوا ای۔ پنشن سسٹم کا اجراءکرنے والا ملک کا پہلا صوبہ ہوگا۔ موجودہ صوبائی حکومت نے اب تک 36 مختلف عوامی خدمات کو آن لائن کردیا گیا ہے جبکہ باقی خدمات کو بھی آن لائن کرنے پر کام تیزی سے جاری ہے