فیصل آباد ، کاشتکاروں کوستمبر کے دوران زیتون کی فصل کی برداشت مکمل کرنے کی ہدایت

منگل 9 ستمبر 2025 13:27

فیصل آباد (اُردو پوائنٹ اخبارتازہ ترین - اے پی پی۔ 09 ستمبر2025ء) محکمہ زراعت نے کاشتکاروں کوستمبر کے دوران زیتون کی فصل کی برداشت مکمل کرنے کی ہدایت کی ہے۔ ترجمان نظامت زرعی اطلاعات محکمہ زراعت نے کہا ہے کہ زیتون کی کاشت کے ذریعے ہر سال خوردنی تیل کی درآمد پر خرچ ہونے والا قیمتی زرمبادلہ بچا کر ملکی معیشت پر پڑنے والے بوجھ کو کم کیا جاسکتا ہے۔

انہوں نے کہا کہ زیتون کے کاشتکار ستمبر کے دوران فصل کی برداشت مکمل کر لیں کیونکہ زیتون کاپھل عام طور پر ستمبر میں پک کر تیار ہو جاتاہے جس کی بروقت برداشت انتہائی ضروری ہے۔ انہوں نے بتایاکہ زیتون کی کاشت گرم معتدل درجہ حرارت والے علاقوں میں کی جاسکتی ہے جبکہ اس کی تجارتی کاشت 30سے 45ڈگری شمالی عرض بلد اور جنوبی بلد کے ان علاقوں میں ہوسکتی ہے جہاں شدید سردی نہ پڑتی ہوتاہم زیتون کی نئی فصل کی کاشت کے لئے پانی کے اچھے نکاس والی زمین کا انتخاب کیا جائے۔

(جاری ہے)

انہوں نے کہا کہ زیتون کی زیادہ تر اقسام میں پھل اور پھول بنانے والی کلیوں کے بننے کے مراحل کے لئے بہار سے قبل سردیوں میں تقریباً 2 ماہ کے لئے روزانہ درجہ حرارت کا اتار چڑھاؤ زیادہ تر 1.5اور 15.5ڈگری سینٹی گریڈ کے درمیان رہنا چاہیے کیونکہ ٹھنڈک کی یہ ضرورت پوری نہ ہونے کی صورت میں پھول اور پھل نہیں بن سکیں گے۔انہوں نے بتایا کہ تجربات کے بعد زیتون کی چند اچھی اقسام شمالی پنجاب کے لئے موزوں پائی گئی ہیں جو اس آب وہوا میں اچھی پیداوار دیتی ہیں۔